Shańyraq kúninde Mańǵystaýda sábıli bolǵan analarǵa qurmet kórsetildi
AQTAÝ. KAZINFORM - Shańyraq kúnine oraı Mańǵystaý oblystyq kópbeıindi aýrýhanasynyń perınataldyq ortalyǵynda bosanǵan analarǵa estelik syılyq tabystaldy.
Ataýly kúnge oraı oblystyq aýrýhana dırektorynyń mindetin atqarýshy Rýslan Amangeldiuly, dırektordyń ana jáne bala isteri boıynsha orynbasary ıÝlııa Asenbaevna, bas akýsher Saltanat Ibragımqyzy, medıtsınalyq qyzmet kórsetý sapasyn baqylaý bóliminiń basshysy Janar Sydyqqyzy, bas medbıke Aıtbıbi Qonarbaevna analardy Shańyraq kúni men kele jatqan Naýryz merekesimen quttyqtady.
«Shańyraq kúni jas urpaqty tárbıeleý mádenıetin, olardyń boıynda patrıotızm, adamgershilik pen eńbekqorlyqqa degen qushtarlyqty qalyptastyrýdy nasıhattaıdy. Sizder, árdaıym shańyraqtyń shattyǵy, urpaqtyń ulaǵatty bolyp ósýi úshin meıirim, mahabbatty berýge daıyn turasyzdar. Bul kún — ata-ana men bala, otbasy úshin óte mańyzdy. Sebebi shańyraǵy bıik, ónegeli otbasy — elimizdiń irgetasy. Osy oraıda sizderge saýlyq, sábıińizge uzaq ǵumyr tileımiz», - dedi Rýslan Amangeldiuly.
Perınataldyq ortalyqta úshinshi balasyna bosanǵan Rysbıbi Muhan qýanyshymen bólisip, medıtsına qyzmetkerlerine alǵysyn jetkizdi.
«Ómirimizdi saqtap qalýǵa, sábıdiń jaryq dúnıege aman-esen kelýine járdemshisi aq halatty abzal jandarǵa alǵysym sheksiz. Jumystaryńyzǵa sáttilik, tabys, otbasyńyzǵa amandyq tileımin», - dedi Rysbıbi Muhan.
Mańǵystaý oblysynda Shańyraq kúni qarsańynda atalǵan ortalyqta 8 sábı jaryq dúnıe esigin ashty. Onyń beseýi ul bala bolsa, úsheýi qyz.
