Shańyraq kúni: Astanada jas juptardyń nekesi qıyldy
ASTANA. KAZINFORM – Naýryznama onkúndiginde 17 naýryz «Shańyraq kúni» bolyp belgilendi. Osy kúni otbasylyq qundylyqtardy dáriptegen, ónegeli urpaq tárbıelegen úlgili otbasylarǵa arnalǵan mádenı is-sharalar ótedi.
«Astana jastary» JRO elordadaǵy AHAT basqarmasymen birlese úsh jas juptyń nekesin qııý rásimin uıymdastyrdy. Qaırat Ryspaev pen Medına Nurmaǵambetova, Aqjol Mels pen Aıtolqyn Qýanyshbek, Álı Sybanbaev pen Aıǵanym Pernebekova esimdi jas otbasylardy quttyqtaý rásimi erekshe formatta ótti.
«Otbasylyq ómirimizdi qyzyqta, birlikte ótkizemiz dep senemin. Bolýy múmkin qıyndyqtardy birlese eńsere alamyz dep oılaımyn. Jas otbasymyzdy Naýryzdaǵy «Shańyraq kúni» aıasynda quttyqtap, erekshe atap ótip jatqanyna alǵys aıtam», - dedi Medına Nurmaǵambetova.
Otaý qurǵandaryna 55 jyl tolǵan Gennadıı Sırov pen Marına Sırovaǵa, sondaı-aq 25 jyl boıy bir shańyraqta ómir súrip jatqan Serik Muqtaev pen Valentına Mendrýhqa da qurmet kórsetildi.
«Úılengenimizge 55 jyl toldy. Eki bala tárbıelep, tórt nemere men bir shóbere súıdik. Otbasy qundylyǵyn jastarǵa tereńirek túsindirgen jón. Shańyraqtyń myqty bolýy nege baılanysty? Erli-zaıyptylar bir-birine senip, bir-birin tyńdap, syılastyqpen qaraýy kerek. Balalardyń kózinshe biz urysqan emespiz jáne kúıeýim eshqashan da aýyr sóz aıtqan emes. Osyndaı syılastyq otbasy qundylyǵyn qalyptastyrýǵa yqpal etedi. Joldasym ekeýmiz 77-ge tolsaq ta, búgingi osy merekelik is-sharada ózimizdi jas sezinip otyrmyz. Jas otbasylar keshirimdi bolýǵa úırenýi qajet, ıaǵnı balalar tolyq otbasyda tárbıe alǵany mańyzdy. Erli-zaıyptylar ajyrasqanda balalar qınalady ǵoı. Eń bastysy, osy merekede barsha qazaqstandyqtarǵa densaýlyq tileımin! Árqashan meıirimdi jáne qonaqjaı bolyńyzdar!», - dedi Marına Sırova.
«Astana qalasy ákiminiń apparaty» MM Áıelder isteri jáne otbasylyq-demografııalyq saıasat jónindegi komıssııanyń bas ınspektory-hatshysy Qarlyǵash Sarkenovanyń aıtýynsha, ónegeli urpaq tárbıelegen úlgili otbasylarǵa qurmet kórsetýge arnalǵan is-sharalardy kóbirek ótkizý kerek. Óıtkeni, olar óziniń ómirlik tájirıbesin arqyly otbasy qundylyǵy jaıynda jastarǵa egjeı-tegjeıli jetkize alady.
Sonymen qatar «Azamattarǵa arnalǵan úkimet» memlekettik emes korporatsııasy» Astana qalasy boıynsha fılıal dırektorynyń orynbasary Baýyrjan Bektursynov elordadaǵy neke qııý statıskasy jóninde aıtty.
«Naýryzdy toılaý aıasynda qalada jaqsy is-sharalar uıymdastyrylyp jatyr. Búgin «Shańyraq kúni» de erekshe atalyp ótti. Statıstıkaǵa qarasaq, Astanada bir kúnde 100-ge jýyq neke qıylady. Elimizdiń tynyshtyǵy men órkendeýi arqasynda jas otbasylar sany óskeni qýantady», - dedi B.Bektursynov.
