Shańyraq kúni: Astanada jas jubaılar «Báıterek» monýmentinde nekelerin qıdy
ASTANA. KAZINFORM - Astanada «Báıterek» monýmentinde Naýryznama onkúndigi aıasynda Shańyraq kúnine arnalǵan saltanatty rásim ótti.
Jas jubaılarǵa neke kýálikteri tabystalyp, altyn toıyn atap ótken juptardyń esimderi «Jyldyq mereıtoı ıeleri kitabyna» engizildi. Bul jıyn urpaqtar sabaqtastyǵy men otbasylyq qundylyqtardy dáripteýdiń erekshe úlgisine aınaldy, dep habarlady elorda ákimdiginiń resmı saıty.
Esil aýdanynyń ákimi Dármenııar Qydyrbekuly quttyqtaý sózinde otbasy qundylyqtarynyń mańyzdylyǵyna toqtalyp ótti.
- Búgin bul sharaǵa biz bárimizge úlgi kórsetetin, 50 jyldan astam bir shańyraqtyń astynda ómir súrip kele jatqan ata-ájelerimizdi arnaıy quttyqtaý úshin de jınaldyq. Bul – otbasylyq qundylyqtardy dáripteý úshin uıymdastyrylǵan óte mańyzdy shara. Jas jubaılar, sizder óz ómirlik serikterińizdi taýyp, Qazaqstan Respýblıkasynyń eń basty sımvoldarynyń biri – «Báıterek» shańyraǵynyń astynda nekelerińizdi resmı túrde qıdyryp jatyrsyzdar. Qutty bolsyn!, - dedi aýdan ákimi.
Astana qalasy boıynsha «Azamattarǵa arnalǵan úkimet» memlekettik korporatsııasy fılıalynyń qyzmetkeri Gúlmıra Smaılova elordada nekege turýshylar sanynyń joǵary ekenin atap ótti.
- Astana qalasynda jyl saıyn 17-18 myńǵa jýyq neke qıylady. Búgingi shara – olardyń arasynda erekshe oryn alatyn mańyzdy oqıǵa. Árbir otbasyna qýanysh, bereke men baqyt tileımiz!, - dep lebizin bildirdi memlekettik korporatsııa qyzmetkeri.
Jarty ǵasyr boıy tatý-tátti ǵumyr keship kele jatqan Jumagúl jáne Oralbek Qurmanǵalıevter jas jupqa aqyl-keńesterin aıtyp, batalaryn berdi.
- Neke qurǵanymyzǵa 50 jyl boldy, altyn toıymyzdy atap óttik. Úsh qyz, úsh ul tárbıelep ósirdik, nemere-shóberelerimiz bar. Otbasy berik bolýy úshin eń bastysy – tózimdilik, syılastyq jáne eńbekqorlyq kerek. Erli-zaıyptylar – eki jarty, bir bútin, sol sebepti barlyq máseleni syılastyqpen sheshý kerek. Mine, biz 50 jyl boıy baqytty ǵumyr keship kelemiz, - dedi astana turǵyndary.
Osyǵan deıin Shańyraq kúnine oraı Astanada otbasylyq estafeta ótkeni týraly jazdyq.
