Shanhaılyq sarapshy: Joldaý bolashaq memlekettiń tutas modelin aıqyndaıdy
ASTANA. KAZINFORM — Prezıdent Qasym-Jomart Toqaevtyń Joldaýynda aıqyndalǵan Qazaqstannyń jańa ustanymy men damý baǵdary eldi «orta derjavaǵa» aınaldyrýdy, Ortalyq Azııadaǵy basty hab retindegi rólin nyǵaıtýdy jáne ekonomıkanyń shıkizatqa táýeldiligin azaıtýdy kózdeıdi. Mundaı pikirdi Shanhaı qoǵamdyq ǵylymdar akademııasy ShYU zertteý ortalyǵynyń dırektory Lı Lıfan Kazinform agenttiginiń Beıjińdegi menshikti tilshisine bergen suhbatynda aıtty.
— Menińshe, bul Joldaýdyń basty ereksheligi — júıeli reformalardan memlekettiń bolashaq damý modelin tutas qalyptastyrýǵa bet burý. Ekonomıka kólemi 400 mıllıard dollarǵa jýyqtap, jan basyna shaqqandaǵy jalpy ishki ónim 19 myń dollardan asqan, al Qazaqstan álemdik reıtıngte 47-satyǵa kóterilgen kezeńde ekonomıkalyq egemendik ulttyq turaqtylyqtyń negizgi tiregi retinde qarastyrylyp otyr, — dedi qytaılyq sarapshy.
Onyń aıtýynsha, Joldaýdyń negizgi úsh tiregi — ınfraqurylymdy damytý, tsıfrlyq basqarý jáne áleýmettik ádildik.
— Eń áýeli 2029 jylǵa deıin Ulttyq qordan bólinetin shamamen 6,5 trıllıon teńge ekonomıkanyń aýmaqtyq qurylymyn ózgertýge jáne óńirler arasyndaǵy alshaqtyqty azaıtýǵa baǵyttalady. Sonymen qatar Qazaqstannyń Eýrazııadaǵy basty tranzıttik torap retindegi mańyzy artyp keledi. Tehnologııalyq salada damýdyń ozyq úlgisine kóshý úshin «halyqtyq tsıfrlyq ekonomıka» men jasandy ıntellektini damytýǵa basymdyq berilse, áleýmettik baǵytta 2027 jylǵa qaraı eń tómengi jalaqyny 110 myń teńgege deıin kóterý josparlanǵan, — dep atap ótti sarapshy.
Lı Lıfan jańa damý kezeńi memlekettik basqarý sapasyn arttyrýdy talap etetinin de atap ótti. Bul rette bıýrokratııany azaıtyp, basshylardyń jeke jaýapkershiligin kúsheıtý jáne memlekettik apparattyń jumysyn barynsha tıimdi uıymdastyrý kózdelgen.
— Negizgi mindet — aýqymdy bastamalardy naqty nátıjege aınaldyrý. Ol úshin ınvestıtsııa tartý tártibin saqtap, qarjynyń jumsalýyn ashyq júrgizý, basqarýshy kadrlardyń kásibı deńgeıin kóterý jáne qoǵamdyq baqylaýdy kúsheıtý mańyzdy. Osy mindetterdiń sapaly oryndalýy reformalardyń tıimdiligin aıqyndap, Qazaqstannyń halyqaralyq arenadaǵy derbes rólin nyǵaıtýǵa jol ashady. Bul rette el ishindegi damý sheshýshi mánge ıe, — dep túıindedi sarapshy.
Sóz sońynda Lı Lıfan Qazaqstan halqyna Joldaýdyń strategııalyq máni men aýqymyna toqtaldy. Qytaılyq sarapshynyń aıtýynsha, onda belgilengen órshil maqsattar memleket aldyna qoıǵan mindetterdiń joǵary deńgeıin ańǵartady. Oǵan qol jetkizý úshin júıeli ári tabandy jumys júrgizý kerek.
Buǵan deıin Qytaı sarapshysy Joldaýdy Qazaqstannyń uzaq merzimdi damýynyń strategııalyq baǵdary dep baǵalaǵanyn jazǵan edik.
