Shanhaıdaǵy jappaı qyspaq úshin polıtsııa jaýapkershilikti moıyndady
ASTANA. QazAqparat - Shanhaı polıtsııasy jańajyldyq túnde Hýanpý aýdanynda jınalǵan adamdar nópirin eskermegenin moıyndady, onyń saldarynan 36 adam mert boldy.
Bul týraly Rosbalt habarlady.
«Polıtsııa saǵat 23.20-ǵa qaraı adamdar nópiriniń arta túsýine der kezinde aralaspaǵanyna ókinedi», - dep DW agenttigi Shanhaıdaǵy Hýanpý aýdany polıtsııa bastyǵynyń orynbasary Tsaı Lısınniń sózin keltirgen.
Merekege bir apta qalǵanda qalalyq bılik adamdardyń kóptep shoǵyrlanýynan qaýiptenip Hýanpýda josparlanǵan lazerlik shoýdy alyp tastaǵan bolatyn. Degenmen onda 300 myńnan astam adam jınaldy. Jańajyldyq túndegi tártipti nebári 700 quqyq qorǵaý organdarynyń qyzmetkerleri kúzetti, qyspaq bastalǵannan keıin ǵana oǵan taǵy 500 polıtseı attandyryldy.
Tsaı Lısın jappaı syǵylysý kóp qabatty ǵımarattardyń birinen jurtqa júz dollarlyq aqshaǵa uqsas jarnamalyq kýpon laqtyrylǵannan keıin bastaldy, degen ýájdi joqqa shyǵardy. «Bul úreı bastalǵannan keıin boldy», - dep atap kórsetti polıtseı.
Budan buryn bılik Shanhaıdyń basty týrıstik kórikti oryndarynyń biri bolyp sanalatyn Vaıtan jaǵalaýyndaǵy qyspaq kezinde qaza bolǵan 36 adamnyń 32-siniń tizimin jarııalady. Baıandamaǵa qaraǵanda, olardyń kópshiligi - áıelder bolǵan. Qazaǵa ushyraǵandardyń arasynda kámeletke tolmaǵan eki jasóspirim bar, olardyń bireýi - 12 jasta.
Áýeli BAQ-ta qyspaq bıik úılerdiń tóbesinen ondaǵan dollarlyq banknottar laqtyrylǵannan keıin bastaldy dep habarlady. Jelide qaıǵyly qyspaqqa sebepshi bolǵan osy «aqsha belgileriniń» sýretteri paıda boldy. Dollar kýpıýralarynyń kóshirmelerine «Baqytty 2015 jylmen!» degen jazýlar jazylǵan.
