Shanhaıda jasandy ıntellektini óndiriske engizetin mamandar daıarlanady
ASTANA. KAZINFORM — Shanhaıda óndiriste jasandy ıntellekt engizetin ınjenerler daıarlaý baǵdarlamasy iske qosyldy, dep habarlaıdy Beıjińdegi Kazinform tilshisi jergilikti bılikke silteme jasap.
Shanhaı bıligi iri tildik jáne neırondyq modelderdi ekonomıkanyń naqty sektoryna ıntegratsııalaı alatyn ınjenerlerdi daıarlaýǵa baǵyttalǵan «3+3+3» baǵdarlamasyn bekitti.
Baǵdarlama úsh sanattaǵy mamandardy qamtıdy. Olar — sheshim qabyldaý sapasyn arttyrýǵa baǵyttalǵan memlekettik kásiporyndardyń basshylary, ınjenerler jáne joǵary oqý oryndarynyń stýdentteri. Basty mindet — algorıtmderdi ázirleý men olardy óndiriste is júzinde qoldaný arasyndaǵy tehnologııalyq alshaqtyqty joıý.
Mundaı ınjenerlerdi kommertsııalyq maqsatta qoldanýdyń tıimdiligin Jincheng Technology kompanııasynyń tájirıbesi kórsetip otyr. Qazir onyń 30 qyzmetkerden turatyn shtaty úzdiksiz jáne dıskretti óndiris salalarynda ondaǵan jobany júzege asyrǵan.
Osy baǵyttaǵy nátıjeli jobalardyń biri Chuanning Biotechnology kásipornynda «JI-ınjenerdi» engizý boldy. Júıe fermentatsııa protsesterin 99,9% dáldikpen boljaıdy. Sonyń nátıjesinde bir aıda óndiris kólemi 5%-ǵa artqan. Bul kórsetkish zaýyt qýatynyń sońǵy bes jyldaǵy jıyntyq ósiminen de joǵary.
Shanhaıda bul baǵytty Shiyuan Technology kompanııasy da damytyp jatyr. Kompanııa baspa platalaryn baqylaý kezinde jabdyqty qaıta baptaý ýaqytyn birneshe saǵattan 55 sekýndqa deıin qysqartty. Al mashına jasaý salasyndaǵy Zhenhua Heavy Industries alyby dánekerleý aqaýlaryn onlaın anyqtaıtyn jasandy ıntellekt júıesin ázirlep jatyr.
Buǵan deıin Qytaı jasandy ıntellektini paıdalanýǵa qatysty jańa erejeler engizgenin jazǵan bolatynbyz.
