Shanhaıda ShYU elderi arasynda komandalyq shahmat týrnıri bastaldy

ASTANA. KAZINFORM – Qytaıdyń Shanhaı qalasynda Shanhaı yntymaqtastyq uıymyna múshe elder arasynda komandalyq shahmat týrnıri bastaldy, dep habarlaıdy Sınhýa.

Halyqaralyq shahmat federatsııasy málimetinshe, jarys Tsınpý aýdanynda ótip jatyr.

Týrnırge Qytaı, Reseı, Belarýs, Tájikstan jáne Ózbekstandy qosa alǵanda, ShYU-ǵa múshe 12 eldiń quramalary qatysýda. Qytaı atynan eki komanda óner kórsetýde. Olardyń qatarynda burynǵy álem chempıony Dın Lıjen men qazirgi álem chempıony Tszıýı Ventszıýn bar.

Jarys rapıd formatynda ótedi. Komandalar eki topqa bólinip, aldymen aınalmaly júıe boıynsha irikteý kezeńinde synǵa túsedi. Ár toptan úzdik shyqqan eki komanda jartylaı fınalǵa joldama alady.

Atalǵan týrnır 2019 jyly qurylǵan. Alǵashqy bes jarys Tsındao qalasynda, keıingi ekeýi Harbınde ótken. Bıylǵy, segizinshi týrnır alǵash ret Shanhaıda uıymdastyrylyp otyr.

Uıymdastyrýshylardyń aıtýynsha, bul jarys ShYU elderi arasyndaǵy shahmat salasyndaǵy yntymaqtastyqty nyǵaıtyp, sporttyq sheberlikti arttyrýǵa jáne halyqaralyq baılanysty keńeıtýge yqpal etedi.

Aıta keteıik, Astanada shahmattan Senat Open týrnıriniń shırek fınaly ótedi.