Shanhaıda ótip jatqan halyqaralyq kórmede almatylyq 12 kompanııa ónimderin usyndy

ALMATY. KAZINFORM – Qytaı Halyq Respýblıkasyna jasaǵan jumys sapary barysynda Almaty ákimi Darhan Satybaldy Shanhaıda ótip jatqan halyqaralyq ımporttyq kórmege (China International Import Expo, CIIE) bardy.

Bul is-shara jyl saıyn álemniń jetekshi kompanııalaryn biriktiretin jáne saýdany, ınvestıtsııany ári tehnologııalyq yntymaqtastyqty damytýǵa yqpal etetin asa iri halyqaralyq alańdardyń biri sanalady.

Qala basshysy almatylyq pavılonnyń jumysymen tanysty. Munda megapolıstiń eksporttyq jáne ınvestıtsııalyq áleýetin tanystyrǵan 12 kompanııa ónimderi men jobalaryn usyndy. Almatylyq kásiporyndar ınnovatsııa, tehnologııa, týrızm, tamaq ónerkásibi jáne kreatıvti ındýstrııa baǵytyndaǵy jobalaryn kórsetti.

Darhan Satybaldy Qazaqstan men Qytaı arasyndaǵy ekonomıkalyq yntymaqtastyqty nyǵaıtýǵa, sondaı-aq Almatynyń ınvestıtsııa men joǵary tehnologııa ortalyǵy retindegi brendin ilgeriletýge bul kórmeniń mańyzy zor ekenin atap ótti.

«Almaty — Qazaqstannyń eń iri ekonomıkalyq ortalyǵy ǵana emes, sonymen qatar halyqaralyq iskerlik baılanystyń mańyzdy alańy. CIIE sııaqty sharalar qalanyń áleýetin tanystyrýǵa jáne ártúrli elderden kelgen seriktestermen tikeleı baılanys ornatýǵa múmkindik beredi», — dedi ákim.

China International Import Expo — Qytaı Úkimetiniń halyqaralyq saýda men ınvestıtsııany yntalandyrýǵa baǵyttalǵan basty bastamalarynyń biri. Kórme jańa tehnologııalyq sheshimderdi usynýǵa, tájirıbe almasýǵa jáne iskerlik kelisimder jasaýǵa arnalǵan ámbebap platforma retinde qyzmet etedi.

Almaty men qazaqstandyq kompanııalardyń CIIE alańyna qatysýy Qytaı aımaqtarymen jáne ınvestorlarymen yntymaqtastyqty nyǵaıtýǵa, sondaı-aq eki el arasyndaǵy mádenı-ekonomıkalyq baılanysty damytýǵa yqpal etedi.

Aıta keteıik, Almatydaǵy tsıfrlyq jobany Qytaı agenttigi qarjylandyrýy múmkin.