Shanhaıda ótetin Qytaı ımporty kórmesinde Qazaqstan óz áleýetin kórsetedi

Qytaıdyń altynshy halyqaralyq ımporttyq EKSPO kórmesi (China International Import Expo) 5-10 qarasha aralyǵynda Shanhaı qalasynda ótedi. Qazaqstan bul kórmege 2018 jyldan beri qatysyp keledi, dep habarlaıdy Kazinform.

«QazTrade saýda saıasatyn damytý ortalyǵy» AQ bas dırektorynyń orynbasary Ásel Egemberdıevanyń aıtýynsha, bıyl Shanhaıǵa Qazaqstannan ókiletti delegatsııa keledi, onyń quramyna 40-tan astam memlekettik, kvazımemlekettik jáne jeke kompanııalar kiredi.

«Bıyl Qazaqstan eki stend arqyly tanystyrylady. Birinshisi – eldik stend. Onda Kazakh Invest, Kazakh Tourism, QTJ, Eır Astana, Qazposhta, UAT sııaqty iri ulttyq kompanııalar elimizdiń eksporttyq, ınvestıtsııalyq, logıstıkalyq, ınnovatsııalyq jáne týrıstik áleýetin tanystyrady. Agroónerkásip salasyn Et odaǵy, Qazaqstannyń maıly daqyldardy qaıta óńdeýshiler ulttyq qaýymdastyǵy, Astyq odaǵy jáne Azyq-túlik korporatsııasy kórsetedi. Ekinshi stend - kommertsııalyq stend, onda otandyq óndirýshiler Qytaı naryǵynda joǵary suranysqa ıe aýyl sharýashylyǵy ónimderin usynady. Qazaqstandyq kásiporyndardyń ımport kórmesine qatysýy - QR Saýda jáne ıntegratsııa mınıstrligi arqyly eksportty yntalandyrý jáne ilgeriletý jónindegi memlekettik sharalardyń biri», - dedi Ásel Egemberdıeva.

Halyqaralyq kórmege qatysý úshin kompanııalardy irikteý kezinde QHR Memlekettik keden basqarmasy ımporttaýshylarynyń tiziliminde turǵan, qytaı naryǵyna eksporttaýǵa ruqsat qujattary men tájirıbesi bar kompanııalarǵa, sondaı-aq ónimderi marketıng turǵysynan tartymdy kásiporyndarǵa basymdyq beriledi.

Sarapshylardyń baǵalaýynsha, qazaqstandyq kásiporyndardyń Qytaıǵa 1 mıllıard dollardan astam somaǵa taýar jetkizýge eksporttyq áleýeti bar.

Ásel Egemberdıevanyń aıtýynsha, qytaılyq tutynýshylardyń suranysyna ıe taýarlar qatarynda dándi daqyldar, maı ónimderi, sondaı-aq ónerkásiptik taýarlar bar. Mal sharýashylyǵy ónimderi men aýyl sharýashylyǵy janýarlaryna arnalǵan qurama jemge suranys joǵary.

«Jyl basynan beri qytaılyq seriktestermen birqatar kezdesýler ótkizildi, QazTrade QR Saýda jáne ıntegratsııa mınıstrliginiń qoldaýymen Hýbeı provıntsııasy, Ýhan jáne Sıan qalalarynda birneshe saýda mıssııalaryn ótkizdi. Kezdesýler nátıjesinde astyq, jarma ónimderin jáne qosylǵan quny joǵary taýarlardy óńdeýge ınvestıtsııa tartý týraly kelisimderge qol jetkizildi. Biz qazir qytaılyq kompanııalar úshin saraptama daıyndap jatyrmyz. Yntymaqtastyqtyń bolashaǵy zor», – deıdi Ásel Egemberdıeva.

QazTrade málimetinshe, 2022 jyly Qytaımen ózara taýar aınalymy 24 mlrd dollardy qurady. Onyń ishinde eksport 13 mlrd dollardan asty. Ásirese Qytaıǵa munaı jáne maı ónimderin jetkizý 13,5 ese ósti. Qazaqstannyń maıly daqyldardy óńdeýshiler ulttyq qaýymdastyǵynyń boljamy boıynsha, aldaǵy birneshe jylda qazaqstandyq kásiporyndar eksporttyq áleýetin 300 mıllıon dollarǵa deıin arttyra alady.

Bıyl Qytaı ımporty kórmesine 137 eldiń kásiporyndary óz taýarlaryn usynady. Olardyń arasynda iri ulttyq kompanııalar men transulttyq korporatsııalar da bar.

«Shanhaı EKSPO kórmesi – bul qytaılyq seriktester qazaqstandyq ónimniń sapasyn óz kózderimen kórip, baǵalaı alatyn aýqymdy alań, sondyqtan memleket jyl saıyn oǵan qatysýǵa úlken kóńil bóledi. Kórme bizdiń ónim óndirýshilerge úlken múmkindikter beredi, senimdi seriktester tabýǵa jáne tájirıbe almasýǵa kómektesedi», - dep túıindedi Ásel Egemberdıeva.

Bes jylda Qytaıdyń ımporttyq kórmesine aýyl sharýashylyǵy ónimderin óndiretin 160 kompanııa qatysyp, 260 mln dollardyń kelisim-shartyna qol qoıyldy.