Shanhaıda Krıshtıaný Ronaldýdyń alyp músini ashyldy
ASTANA. KAZINFORM — 21 qarasha kúni Shanhaı qalasyndaǵy Nankın kóshesinde álemdik fýtboldyń jarqyn juldyzy Krıshtıaný Ronaldýdyń qurmetine arnalǵan jer betindegi eń bıik eskertkish saltanatty túrde ashyldy. Sondaı-aq ańyz fýtbolshynyń Qytaıdaǵy alǵashqy mýzeıiniń ashylý rásimi ótti. Bul týraly Shanghai Observer aqparattyq basylymy jazdy.
Osy jyldyń 5 qarashasynda Ronaldý Portýgalııa ulttyq quramasyndaǵy mansabyn aıaqtaǵanyn jarııalaǵan edi. Ol qurama sapynda 234 match ótkizip, 146 gol soqqan. Sondaı-aq Eýropa chempıonatynyń bir jáne Ulttar lıgasynyń eki dúrkin jeńimpazy atanǵan.
Arada on shaqty kúnnen keıin, Shanhaıdaǵy Nankın kóshesinde fýtbolshynyń bıiktigi 7 metrlik músini ashyldy. Músinde Ronaldýdyń jankúıerlerge jaqsy tanys goldan keıingi qımyly — SIU beınelengen. Jeti metrlik bıiktik — fýtbolshynyń jetinshi nómirli jeıdesiniń ısharasy. Sonymen qatar bul kórsetkish Qytaıǵa tanymal Shanghai No.1 Department Store ámbebap dúkenniń 77 jyldyq mereıtoıymen de baılanysty.
Músinmen qatar Ronaldý mýzeıi de materıktik Qytaıda kórermenderge aıqara esik ashty. Bul álemdik sport juldyzynyń Qytaıdaǵy iri saýda ortalyǵynda ashylǵan alǵashqy jeke mýzeıi.
Mýzeıdiń ashylý rásimine qatysqan fýtbolshynyń aǵasy Ýgý Aveırý eksponat-júldelerdiń aıryqsha mánine toqtaldy.
— Men úshin de, Ronaldý úshin de bul mýzeı men Shanhaıda qoıylǵan júldeler tártiptiń, eńbekqorlyqtyń jáne tabandylyqtyń kórinisi. Árbir júldeniń tarıhyn kópshilikpen bólisý — biz úshin teńdesi joq qýanysh. Olardy Qytaı jankúıerleri men jurtshylyǵyna tanystyrýdy zor mártebe sanaımyz, — dedi ol.
Ronaldý mýzeıiniń aýmaǵy 3 myń sharshy metrge jýyq, keshen 10 taqyryptyq bólim men 15 arnaıy kórme keńistigine bólingen. Onda fýtbolshynyń Madeıra aralyndaǵy balalyq shaǵynan «Altyn dopty» bes ret ıelengen mereıli sátine deıingi sporttyq joly kórsetilgen.
Kórme keńistiginde Ronaldýdyń týǵan jeri Madeıra aralynyń maketi, Lıssabonnyń «Sportıng» klýbyndaǵy jattyǵý bólmesi men jeke qonaq bólmesiniń, kıim aýystyrý bólmesiniń jáne Saýd Arabııasynyń «Ál-Nasr» klýbynyń alańǵa shyǵar kúmbezdi esiginiń 1:1 kóshirmesi kelýshilerdi tańdaı qaqtyrady. Olar osy arqyly fýtbolshynyń ómiri men sporttyq ortasyn jaqynnan tanyp-bilýge múmkindik alady.
Mýzeıge Ronaldýdyń týǵan jerinen 50-den astam júlde, tarıhı jeıde men fýtbol aıaqkıimi jetkizilgen. Olardyń basym bóligi Qytaıda alǵash ret kópshilik nazaryna usynylyp otyr.
Eksponattar qatarynda 2008 jylǵy «Altyn dop» júldesi, jattyqtyrýshysy Zıdan men komandalastarynyń qoltańbasy qoıylǵan jeıde, Portýgalııa quramasynyń Eýropa chempıonaty kýbogy jáne alańda jyrtylǵan aıaqkıim bar. Sondaı-aq Ronaldý Shanhaıdaǵy mýzeıge arnap qoltańbasy qoıylǵan jeıdesin syılyqqa jibergen.
Buǵan deıin Fýtbol tarıhyndaǵy eń úzdik oıynshylardyń biri Ronaldýdyń Portýgalııa ulttyq quramasyndaǵy mansaby aıaqtalǵany týraly jazǵan edik.