Shanhaıda Halyqaralyq valıýta qorynyń óńirlik ortalyǵy ashyldy

ASTANA. KAZINFORM — Shanhaıda Halyqaralyq valıýta qorynyń óńirlik ortalyǵy resmı túrde jumysyn bastady, dep habarlaıdy HVQ.

Aıtylǵandaı, Shanhaıdaǵy Halyqaralyq valıýta qory ortalyǵy qordyń qarqyndy damyp kele jatqan Azııa-Tynyq muhıty óńirimen ózara is-qımylyn keńeıtýde mańyzdy ról atqarady.

— Bul ortalyq zertteý júrgizýge jáne bilim almasýǵa yqpal etetin alańǵa aınalady. Bul zertteý men bilim qalyptasyp kele jatqan naryqtary bar elder men orta tabysty memleketter úshin ózekti saıasatty ázirleýde paıdalanylýy múmkin, — delingen HVQ habarlamasynda.

Qordyń málimetinshe, Shanhaı ortalyǵynyń qyzmeti múshe memlekettermen, óńirlik ınstıtýttarmen jáne basqa da múddeli taraptarmen dıalog pen ózara is-qımyldy tereńdetýge baǵyttalǵan.

Jańa óńirlik ortalyqtyń alǵashqy dırektory bolyp jahandyq jáne óńirlik ekonomıkalyq saıasat salasynda keń tájirıbesi bar HVQ ekonomısi Iohannes Vıgand taǵaıyndaldy.

HVQ derekterine sáıkes, uıymnyń álemniń ártúrli óńirlerinde 20 ortalyǵy men keńsesi bar. Qytaıda sonymen qatar Qytaı men HVQ-nyń áleýetti damytý ortalyǵy jumys isteıdi.