Shanhaıda aptap ystyq uzaqtyǵy boıynsha júz jyldyq rekord jańardy

ASTANA. KAZINFORM — Senbi kúni Qytaıdyń shyǵysyndaǵy Shanhaı qalasynda qatarynan 25-shi kún boıy aýa temperatýrasy Tselsıı boıynsha 35 gradýstan joǵary bolyp tirkeldi, dep habarlaıdy Sınhýa.

Osylaısha, qala tarıhyndaǵy úzdiksiz ystyq kúnderdiń eń uzaq kezeńi boıynsha shamamen júz jyl buryn ornatylǵan rekord jańartyldy.

Shanhaı qalasynyń meteorologııalyq qyzmetiniń málimetinshe, aldyńǵy rekord 1926 jyly tirkelgen. Ol kezde aptap 22 shildeden 14 tamyzǵa deıin jalǵasyp, qatarynan 24 kún boıy aýa temperatýrasy 35 gradýstan túspegen.

Buǵan qosa, bıylǵy jyldyń ózinde Shanhaıda jalpy 44 kún ystyq bolǵan.

Bıylǵy jyly alǵashqy aptap ystyq kún 17 maýsymda tirkelgen — bul sońǵy jyldardaǵy ortasha kórsetkishten shamamen 10 kúnge erte. Tamyz aıyndaǵy ystyq erekshe kúshti boldy: sońǵy 30 kúnniń ishinde 26 kún aýa temperatýrasy joǵary bolǵan. Bul ótken jyly tirkelgen tamyz aıyndaǵy tarıhı rekordpen sáıkes keledi.

Meteorolog Chjý Sıýeıanniń aıtýynsha, aptaptyń uzaqqa sozylýyna Tynyq muhıtynyń soltústik-batys bóligindegi sýbtropıkalyq joǵary qysym júıesiniń anomaldy qozǵalysy sebep. Onyń aıtýynsha, tamyz aıynyń basynan bastap sýbtropıkalyq antıtsıklon qaıta kúsheıip, ıAntszy ózeni atyraýynyń ústinde turaqtanyp qalǵan, bul óńirde joǵary temperatýranyń saqtalýyna qolaıly jaǵdaı týǵyzǵan.

Buǵan deıin Ispanııadaǵy orman órti rekordtyq deńgeıge jetkenin jazǵan edik.