Shanhaıda 36 adamnyń qazasynan keıin jańa jyldyq sharalar toqtatyldy
ASTANA. QazAqparat - Qytaıdyń Shanhaı qalasy basshylyǵy shamamen 36 adamnyń ólimine sebep bolǵan Vaıtan jaǵalaýyndaǵy yǵy-jyǵy oqıǵadan keıin barlyq jańa jyldyq sharalardy toqtatý týraly sheshimin shyǵardy, dep jazdy RIA Novostı.
Budan buryn qaza bolǵandar 35, jaralanǵandar sany 48 dep habarlanǵan bolatyn. Jergilikti bılikke silteme jasaǵan South China Morning Post basylymynyń derekterine súıensek, zardap shekkenderdiń ishinde 13 adamnyń jaǵdaıy aýyr. Basylym derekterinde jańa jyldy toılamaý týraly sheshim QHR tóraǵasy Sı Tszınpınniń Shanhaı bıligine zardap shekkenderge qoldan kelgen kómektiń barlyǵyn jasaý, bolǵan oqıǵany tyńǵylyqty tekserý qajettigi jaıly tapsyrma bergennen keıin qabyldandy. Oqıǵa sársenbide jergilikti ýaqyt shamamen saǵat 23.35 mınýtta aıtýly merekelerde halyq kóp jınalatyn Vaıtan jaǵalaýynda oryn aldy. Bolǵan jaǵdaıdan keıin polıtseıler jaralanǵandardy qaýipsiz jerge shyǵaryp, jedel járdem kóligine jetkizý úshin bir biriniń qoldarynan ustap, tobyr tegýrinin toqtatýǵa tyrysqan. Jergilikti BAQ qaza tapqandar men zardap shekkenderdiń kópshiligi 20 jas shamasyndaǵy jastar, onyń ishinde kolledj stýdentteri ekenin aıtady. Qaıǵyly oqıǵa sebepteri ázirge anyqtalǵan joq, kýágerlerge silteme jasaǵan birqatar BAQ aqparatyna súıensek, oqıǵa jaqyn jerdegi 18-qabatty ǵımarattyń shatyrynan dollar kóshirmelerin laqtyrǵan sátte bastalǵan. Polıtsııa oqıǵaǵa sebep bolýy múmkin atalǵan nusqany tekserip jatyr.
