Shanhaı ýnıversıtetinde qazaq tili men ádebıeti kafedrasy ashyldy
BEIJІŃ-ShANHAI. QazAqparat - Ál-Farabı atyndaǵy Qazaq Ulttyq ýnıversıteti Qytaıdaǵy Shanhaı shet tilderi ýnıversıtetinde (ShShTÝ) qazaq tili men ádebıeti kafedrasyn ashty. Bul ortaq joba Qytaıdaǵy QR Elshiligi men Shanhaı qalasyndaǵy QR Bas konsýldyǵynyń qoldaýymen júzege asty.
Saltanatty sharaǵa QazUÝ rektory, akademık Ǵalym Mutanov bastaǵan ýnıversıtet delegatsııasy qatysty. Kezdesý barysynda ShShTÝ partııalyq komıtetiniń tóraǵasy Tszıan Fen joǵary oqý ornynda 30 shet tilinde mamandar daıyndalatyndyǵyn jetkizdi. Jańa oqý jylynan qazaq tili oqytyla bastady jáne oǵan qytaılyq stýdentter úlken qyzyǵýshylyq tanytýda. Ol mamandandyrylǵan kafedrany ashýǵa kórsetken kómegi men qoldaýy úshin QazUÝ rektory Ǵ. Mutanov pen Qazaqstannyń dıplomatııalyq qyzmetine alǵys bildirdi.
«QazUÝ Memleket basshysy N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda qoıylǵan tapsyrmalardy júzege asyrý úshin maqsatty túrde jumys isteýde. Qazaq tiliniń damýyna erekshe kóńil bólinýde. Memlekettik tilimiz kópultty Qazaqstanda biriktirýshi ról atqarsa, Qazaqstan men Qytaıdyń dostyǵy men yntymaqtastyǵyn arttyrýda baılanystyrýshy kópirge aınalyp otyr. QazUÝ jahandyq ǵylymı-bilim berý keńistigine úlken belsendilikpen enýde. Qytaılyq JOO-larmen áriptestik barysynda kóptegen jobalar júzege asýda. Solardyń biri retinde Shanhaı shet tilderi ýnıversıtetinde qazaq tili men ádebıeti kafedrasynyń ashylýyn aıta alamyz», - dep atap ótti Ǵalym Mutanov. 
Qazaq tilin QazUÝ oqytýshylary úıretetin bolady. Qazirgi tańda «Qazaq tili men ádebıeti» mamandyǵy boıynsha 13 qytaılyq stýdent bilim alýda. Stýdenttermen kezdesý barysynda QazUÝ rektory ýnıversıtet týraly, akademııalyq utqyrlyq baǵdarlamasy boıynsha tájirıbeden jáne tildik taǵylymdamadan ótý múmkindigi jaıly aıtyp, jastardy qyzyqtyrǵan suraqtarǵa jaýap berdi jáne oqýda sáttilik tiledi. Ol qytaılyq stýdentterge qazaq tilin oqyp-úırenýge arnalǵan oqýlyqty saltanatty túrde tabys etti.
«Qazaqstannyń jetekshi oqý orny - ál-Farabı atyndaǵy QazUÝ sheteldik JOO-larmen halyqaralyq yntymaqtastyqta úlken tájirıbege ıe. Ótken jyldan bastap QazUÝ-dyń qoldaýymen Beıjiń shet tilderi ýnıversıtetinde de qazaq tili páni júrgizile bastaǵanyn atap ótýge tıispiz. Qazaq tili atalmysh oqý ornynda oqytylatyn 73-shi tilge aınaldy. Shanhaı shet tilderi ýnıversıtetinde birlese otyryp ashylǵan kafedranyń belsendi jumys isteıtinine jáne onyń qazaq mádenıeti men tiliniń tanylýyna, eki eldiń kórshilik jáne ózara tıimdi qarym-qatynastarynyń nyǵaıýyna oń yqpal eterine senemin», - dedi Shanhaı qalasyndaǵy QR Bas konsýly Joshyhan Qyraýbaev.
Sapar aıasynda QazUÝ men ShShTÝ yntymaqtastyq týraly memorandýmǵa qol qoıdy. Ol joǵary bilikti mamandardy daıarlaýǵa, sondaı-aq ǵylymı bilim berý salasyndaǵy ortaq qyzmet aýqymyn keńeıtýge baǵyttalǵan.
