Úrimjide Shanhaı yntymaqtastyq uıymynyń tsıfrlyq ekonomıka jónindegi forýmy ótedi
ASTANA. KAZINFORM — Qytaıdyń Shyńjań-Uıǵyr avtonomııalyq ólkesiniń ákimshilik ortalyǵy Úrimji qalasynda 14–16 qyrkúıek aralyǵynda Shanhaı yntymaqtastyq uıymynyń (ShYU) tsıfrlyq ekonomıka jónindegi forýmy ótedi, dep habarlaıdy Sınhýa.
Іs-sharaǵa ShYU-ǵa múshe elderdiń úkimetteri, saraptamalyq ortalyqtary, iri kompanııalary, joǵary oqý oryndary men salalyq qaýymdastyqtarynyń ókilderi, shamamen 500 adam qatysady.
Qytaı Memlekettik derekter basqarmasy basshysynyń orynbasary ıÝı Inniń aıtýynsha, forým baǵdarlamasyna mınıstrler kezdesýi, ashylý saltanaty, plenarlyq otyrys, tórt taqyryptyq qosalqy forým jáne basqa da is-sharalar kiredi.
Mınıstrler tsıfrlyq saladaǵy úkimetaralyq yntymaqtastyqty damytý máselelerin talqylaıdy. Sondaı-aq qatysýshylar ShYU elderiniń 2026–2027 jyldarǵa arnalǵan tsıfrlyq ekonomıka salasyndaǵy yntymaqtastyǵynyń basym baǵyttarynyń tizimin ázirleıdi.
Jekelegen sessııalarda tsıfrlyq baılanystylyq, elektrondy saýda jáne kólik-logıstıkalyq dálizderdi damytý máseleleri qaralady. Sonymen qatar sarapshylar ónerkásipte tsıfrlyq jáne zııatkerlik tehnologııalardy qoldaný, tsıfrlyq basqarý jáne tsıfrlyq daǵdylardy damytý taqyryptaryn talqylaıdy.
Іskerlik baǵdarlama ınteraktıvti kórme jáne kompanııa ókilderiniń kezdesýlerimen tolyqtyrylady. Qatysýshylar jergilikti tsıfrlyq jobalar men kásiporyndardyń jumysymen tanysa alady.
Sońǵy jyldary ShYU kún tártibinde tsıfrlyq ekonomıka baǵyty mańyzdy oryn alǵan. 2025 jylǵy qyrkúıekte Tıantszınde ótken uıym sammıtinde múshe memleketterdiń kóshbasshylary tsıfrlyq ekonomıkany damytý týraly málimdeme qabyldaǵan edi.
Eske sala keteıik, maýsym aıynda Qytaı astanasy Beıjiń qalasynda Shanhaı yntymaqtastyq uıymynyń qurylǵanyna 25 jyl tolýyna arnalǵan saltanatty qabyldaý ótti.
