Shanhaı ınternet-kontent ortalyǵyna aınalýdy kózdeıdi
ASTANA. KAZINFORM — Shanhaı qalasynyń bıligi megapolısti sapaly ınternet-kontent óndiretin halyqaralyq ortalyqqa aınaldyrý maqsatynda jańa qoldaý sharalaryn jarııalady. Bul týraly Kazinform Sınhýa agenttigine silteme jasap habarlaıdy.
Qujatqa sáıkes, Hýanpý jáne ıAnpý aýdandary jahandyq kontent óndirý klasterin qalyptastyrý úshin pılottyq aımaqtar retinde belgilendi. Joǵary tıimdilik kórsetken tsıfrlyq platformalar, ınkýbatorlar men ındýstrııalyq parkter jyl saıyn 10 mıllıon ıýanǵa deıin (shamamen 1,4 mln AQSh dollary nemese 733 mln teńge) qoldaý ala alady.
Negizgi qoldaý sharalaryna mynalar kiredi:
-
sheteldik kontent-meıkerler úshin vıza rásimdeý tártibin jeńildetý;
-
mádenı nysandar men kórnekti oryndardy túsirilimge ashý;
-
halyqaralyq forýmdar men baıqaýlar uıymdastyrý.
Sonymen qatar, jasandy ıntellekt salasyndaǵy jobalar jalpy shyǵyndardyń 30 paıyzyna deıin sýbsıdııa ala alady. Al jeke avtorlar úzdik týyndylary úshin 100 myń ıýanǵa deıin (shamamen 14 myń dollar nemese 7,3 mln teńge) grantqa úmitker bola alady.
Sala ókilderine jeńildetilgen nesıe, kovorkıng keńistikteri, jas mamandarǵa qyzmettik baspana, shyǵarmashylyq mamandyqtar boıynsha sertıfıkattaý rásimderin jeńildetý sııaqty múmkindikter de qarastyrylǵan. Talantty kontent avtorlary Shanhaıdyń kadrlyq yntalandyrý baǵdarlamalaryna qatysa alady.
Aıta keteıik, buǵan deıin Shanhaı men Almatynyń dostas qala atanǵany habarlanǵan bolatyn.