Shanhaı Dısneılendi 10 jyldyǵyn atap ótti: saıabaqqa 100 mıllıonnan astam adam kelgen
ASTANA. KAZINFORM — Shanhaı Dısneılendi ashylǵannan beri 10 jyl ótti. Osy ýaqyt ishinde Qytaıdaǵy eń iri saıabaqqa 100 mıllıonnan astam adam barǵan, dep habarlaıdy Sınhýa.
Shanhaı Dısneılendiniń prezıdenti ári bas dırektory Endrıý Bolshteın park aýmaǵynda «Órmekshi adam» atty jańa taqyryptyq aımaqtyń qurylysy jalǵasyp jatqanyn habarlady. Jaqynda negizgi attraktsıon — fırmalyq qyzyl jolaqty amerıkandyq tóbeshikke arnalǵan relsterdi tóseý jumystary aıaqtalǵan.
On jyl ishinde park Shanhaıdaǵy eń iri týrıstik nysandardyń birine aınaldy. Onyń qyzmeti 15 myńnan astam jumys ornyn qurýǵa yqpal etti.
Park damýy megapolıstegi týrızm salasynyń ósýimen qatar júrip keledi. Eger 2011 jyly Shanhaıǵa shamamen 230 mıllıon ishki týrıst kelgen bolsa, týrızmnen túsetin tabys 40,9 mlrd dollar (278,6 mlrd ıýan) bolǵan, al 2025 jylǵa qaraı týrıster sany 416 mıllıon adamǵa jetip, tabys shamamen 83,2 mlrd dollardy (566,68 mlrd ıýan) qurady.
Qytaıdaǵy vızasyz rejımniń keńeıýi de qosymsha týrıster aǵymyn arttyrdy. Ásirese Japonııa, Koreıa jáne Ońtústik-Shyǵys Azııa elderinen kelýshiler sany aıtarlyqtaı ósken.
The Walt Disney Company kompanııasynyń bas dırektory Djosh D’Amaro park jasaýshylar Disney dástúrlerin qytaı mádenıetimen ushtastyryp, álemdik deńgeıdegi biregeı joba qurýdy maqsat etkenin aıtty.
Shanhaı Dısneılendindegi bılet baǵasy maýsym men apta kúnine baılanysty ózgerip otyrady: shamamen 475–799 ıýan (65–110 dollar). 3–11 jas aralyǵyndaǵy balalar men 65 jastan asqan qonaqtarǵa 25% jeńildik qarastyrylǵan.
Aıta keteıik, álemdegi eń tanymal parkterdi salýshy áıgili amerıkalyq IdeAttack, Inc. kompanııasy Qyrǵyzstanda halyqaralyq deńgeıdegi Dısneılend salmaq.
