Shańǵy sporty: A.Poltoranın 15 km qashyqtyqta altyn júldeni jeńip aldy
ASTANA. QazAqparat - Germanııanyń Oberstdorf qalashyǵynda shańǵy sportynan «Týr de Skı» kópkúndik jarysynyń besinshi kezeńinde klassıkalyq stılmen 15 km qashyqtyqta qazaqstandyq Alekseı Poltoranın altyn medaldi jeńip aldy.
Vesti.kz saıtynan alynǵan málimetke qaraǵanda, erler arasyndaǵy atalmysh kópshilik jarystyń tartysty bolǵany sondaı, A.Poltoranın ataqty shveıtsarııalyq Darıo Kolonıadan 0,01 sekýndqa qana ozyp, 35 mınýt 35,9 sekýnd kórsetti. Úshinshi oryndy ıelengen ıtalıandyq Franchesko Da Fabıanı jeńimpazdan 0,6 sekýndqa qalyp qoıdy.
Bul - A.Poltoranınniń álem kýbogy kezeńderindegi toǵyzynshy jeńisi jáne 22-inshi júldesi. Onyń ústine A.Poltoranınniń súıikti qashyqtyǵy bolyp esepteletin 15 kılometrden klassıkalyq jarysta qazaqstandyq shańǵyshydan basqa eshkim eki retten artyq jeńiske jetip kórgen emes. Bul - Alekseıdiń osy qashyqtyqtaǵy úshinshi jeńisi.
Osy besinshi kezeńnen keıin A.Poltoranın «Týr de Skı» jarysynyń jalpy esebinde alǵashqy úshtikke jaqyndady. Munda norvegııalyq Martın Ionsrýd Sýndbıý 2 saǵat 15 mınýt 16,6 sekýndpen kósh bastasa, onyń otandasy Petter Nortýg (+47,2) ekinshi, reseılik Sergeı Ýstıýgov (+1.09,4) úshinshi, A.Poltoranın tórtinshi (+1.31,5) orynda keledi.
Eske sala keteıik, «Týr de Skı» jarysynyń Shveıtsarııanyń Lentserhaıde mekeninde ótken ekinshi jáne úshinshi kezeńinde A.Poltoranın besinshi jáne jetinshi oryndy ıelense, Oberstdorfta klassıkalyq sprıntte qola júldeni enshilegen bolatyn. Endi «Týr de Skı» jarysynyń altynshy kezeńi 8 qańtar kúni Italııanyń Toblah mekeninde ótedi. Onda shańǵyshylar 10 shaqyrymǵa erkin stılmen jarysqa túspek. Al kópkúndiktiń jetinshi jáne qorytyndy segizinshi kezeńi Val dı Fıemme (bul da Italııada) mekeninde bolmaq.
