Shańǵy: Şýchede Shyǵys Eýropanyń qurlyqtyq kýbogy sarapqa salyndy
KÓKShETAÝ. QazAqparat – Aqmola oblysynyń Şýche qalasynda shańǵy jarysynan Shyǵys Eýropanyń qurlyqtyq kýbogy sarapqa salyndy, dep habarlaıdy QazAqparat tilshisi.
Ulttyq shańǵy ortalyǵynda ótken jarysqa Reseı, Belarýs jáne Morokko koroldiginen jáne Qazaqstannyń 8 óńirinen jınalǵan 150 astam sportshy qatysty. Jarys klassıkalyq sprınt, klassıkalyq jekeleı jarys jáne erkin jekeleı jarys tásilderi boıynsha ótti.
Jarys qorytyndysy boıynsha, qazaqstandyq shańǵyshylar eki júldeli oryn aldy. Onyń ishinde klassıkalyq jekeleı jarysta Konstantın Bortsov úshinshi oryn alsa, erkin jekeleı jarysta Vıtalıı Pýhkalo jeńimpaz atandy.
«Jeńis bizge oı kelgen joq. Reseı jáne Belarýs sportshylary tarapynan básekelestik óte kúshti boldy. Biz jarysty ózimizde ótkizip otyrǵandyqtan namysqa tyrysyp baqtyq. Bar kúsh-jigerimizdi sarp ettik. Uıymdastyrý deńgeıi de óte joǵary boldy. Jankúıerlerde qoldaý bildirdi. Osynyń arqasynda joǵary kórsetkishke qol jetkizdik», -dedi Vıtalıı Pýhkalo.
Vedomstvonyń málimetinshe, jarys aıaqtalysymen Shańǵy jarysynan Qazaqstan ulttyq qurmasy ulttyq shańǵy ortalyǵynda oqý-jattyǵý jumystaryn bastap ketti. Jattyǵý sharalary 24 qarashaǵa deıin jalǵasady.
Osydan keıin ulttyq qurama sapyna engen aqmolalyq shańǵyshylar Olga Dýlına-Mandrıka, Valerııa Tıýleneva, Oljas Klımın, Konstantın Bortsov, Evgenıı Velıchko jáne Denıs Volotka Fınlıandııanyń Rýka qalasyna attanyp, Álem kýbogynyń 1-shi kezeńine qatysatyn bolady.
