Shańǵy jarysynan sońǵy júlde jıyntyǵy sarapqa salyndy
ASTANA. KAZINFORM - Búgin XXV qysqy Olımpıada oıyndarynda shańǵy jarysynan sońǵy júlde jıyntyǵy sarapqa salyndy.
QR Týrızm jáne sport mınıstrligi Sportty damytý dırektsııasynyń baspasóz qyzmetiniń habarlaýynsha, áıelder arasynda klassıkalyq mánerde 50 shaqyrym qashyqtyqqa elimizdiń atynan Nadejda Stepashkına men Anna Melnık qatysty. Nátıjesinde Nadejda Stepashkına 31, Anna Melnık 35-oryndy mise tutty.
Bul jarysta Ebba Andersson (Shvetsııa) altyn alsa, Heıdı Veng (Norvegııa) pen Nadıa Kelın (Shveıtsarııa) odan keıingi oryndardy ózara bólisti.
Aıta ketsek, shańǵy jarysynan uzaq jyldan beri Soltústik Eýropa aýmaǵynda ornalasqan Skandınavııa túbegi elderiniń sportshylary kóshbasshy sanalady.
Mılandaǵy Olımpıadada sporttyń bul túrinen 12 júlde jıyntyǵy (erler 6, áıelder 6) sarapqa salyndy. Onda elimizdiń atynan Ámirǵalı Muratbekov, Naıl Bashmakov, Nadejda Stepashkına men Anna Melnık jarys jolyna shyqty.
2026 jylǵy qysqy Olımpıadaǵa álemniń 90-nan astam elinen shamamen 2 900-3 500 sportshy qatysty. Baıraqty básekede 16 sport túri boıynsha 116 medal jıyntyǵy sarapqa salyndy.
Qazaqstan bıyl qysqy Olımpıada oıyndarynda 10 túrinen 58 medal jıyntyǵy boıynsha baq synady.
Qysqy Olımpıadada elimizdiń atynan mánerlep syrǵanaý sheberi Mıhaıl Shaıdorov chempıon ataǵyn jeńip aldy.