Shańdy daýyl, tuman, kóktaıǵaq: 5 qarashaǵa arnalǵan aýa raıy boljamy
NUR-SULTAN. QazAqparat - Sınoptıkter 5 qarasha kúngi aýa raıyna boljam jasady, dep habarlaıdy QazAqparat «Qazgıdrometke» silteme jasap.
Sýyq antıtsıklon Qazaqstan terrıtorııasyna óz áserin saqtaıdy – jaýyn-shashyn jaýmaıdy jáne aýa temperatýrasy tómendeıdi.
Tek ońtústik-shyǵystyń taýly aýdandarynda fronttardyń áserinen qar jaýady, jaıaý burqasyn kóteriledi.
Respýblıkanyń basym bóliginde jel kúsheıip, ońtústik pen ońtústik-batysta shańdy daýyl soǵady, soltústik pen ońtústik-shyǵysta tuman túsedi.
Túrkistan oblysynyń soltústigi, batysy men taýly aýdandarynda jeldiń ekpini 23-28 m/s jetedi. Soltústiginde shańdy daýylmen birge jel turady.
Jambyl oblysynyń ońtústik-batysynda, soltústik-shyǵysynda jáne taýly aýdandarynda jeldiń ekpini 23 m/s deıin kúsheıedi. Taýly aýdandarynda tuman túsip, jaıaý burqasyn bolady.
Almaty oblysynyń taýly aýdandary men taý bókterinde túnde jáne tańerteń tuman, Alakól kólderi mańaıynda jeldiń kúshi - 17-22 m/s.
Qyzylorda oblysynyń ortalyǵy men ońtústiginde jel qarqyny 15-20 m/s jetedi, ortalyǵynda shańdy daýyl soǵady.
Mańǵystaý oblysynyń ońtústik-batysy men soltústik-shyǵysynda jel jyldamdyǵy 15-20 m/s shamasynda, shańdy daýyl turady.
Atyraý oblysynyń soltústiginde, kúndiz Aqmola oblysynyń soltústiginde, Batys Qazaqstan oblysynyń ońtústiginde jel ekpini - 15-20 m/s.
Soltústik Qazaqstan oblysynyń túnde ońtústik-shyǵysynda, kúndiz basym bóliginde jeldiń kúshi 15-20 m/s jetedi, túnde jáne tańerteń soltústik-batysynda tuman túsedi.
Qostanaı oblysynyń batysynda tuman, soltústiginde jel qarqyny 15-20 m/s deıin kúsheıedi.
Qaraǵandy oblysynyń soltústiginde tuman túsedi.
