Shandýn provıntsııasynda Qazaqstannyń saýda ókildigi ashylýy múmkin
ShANЬDÝN. KAZINFORM — QHR-ǵa jumys sapary barysynda QR Saýda jáne ıntegratsııa mınıstri Arman Shaqqalıev Shandýn provıntsııasynyń Halyq úkimeti tóraǵasynyń orynbasary Sýn Tszıýntszımen kezdesti.
Taraptar Qazaqstan men Shandýn provıntsııasy arasyndaǵy saýda-ekonomıkalyq yntymaqtastyqty tereńdetýdiń negizgi máselelerin talqylady.
«Ótken jyldan beri biz Qytaımen saýda-sattyqty aımaqtandyrý prıntsıpi boıynsha damytyp, ár óńirmen onyń erekshelikterin eskere otyryp jumys istep jatyrmyz. Bul tásil qazirdiń ózinde Sychýan, Hýbeı jáne Shyńjań provıntsııalarynda qoldanylǵan. Biz sondaı-aq saýda-ekonomıkalyq baılanystardy arttyrý úshin aımaqtyq ózara is-qımyl tetikterin paıdalana otyryp, Shandýnmen yntymaqtastyqty nyǵaıtýǵa daıynbyz», — dep atap ótti mınıstr Shaqqalıev.
Sondaı-aq mınıstr Qazaqstannyń eksporttyq áleýeti, AÓK naryǵyna ónimniń ashyq qoljetimdiligi jáne muzdatylǵan et pen basqa da taýarlardy jetkizýdi jańartý múmkindigi týraly aıtyp ótti.
Sýn Tszıýntszı myrza Qazaqstan men Qytaı arasyndaǵy saýda kólemin ulǵaıtý jáne saýda saıasatyn jetildirý úshin jumys tetigin qurýdy usyndy.
Sonymen qatar, provıntsııanyń Halyq úkimeti tóraǵasynyń orynbasary ShUAA-ǵa uqsas Shandýn qalasynda «QazTrade» AQ saýda ókildigin ashýdy usyndy, bul óz kezeginde óńirdegi otandyq bıznestiń múddesin tıimdi qorǵaýǵa múmkindik beredi.
Saýda jáne ıntegratsııa mınıstri Arman Shaqqalıev usynystardy muqııat qaraýǵa daıyn ekenin bildirip, Qazaqstan men Shandýn arasyndaǵy óńirlik yntymaqtastyq tetikteriniń erekshe mańyzy bar ekenin aıtty.
Aıta keteıik, 2024 jyldyń jeti aıynda Qazaqstan men Shandýn provıntsııasy arasyndaǵy taýar aınalymy 869,1 mıllıon AQSh dollaryn qurady.
Eksport 3,23%-ǵa ósip, 348 mln AQSh dollaryn qurady. Osy kezeńde Qazaqstanǵa ımport 521,0 mln AQSh dollaryna jetti.
