Shańdy jáne qumdy daýyldar jıilep barady
ASTANA. KAZINFORM — Atqarylyp jatqan qyrýar jumysqa qaramastan, jerdiń tozýy men shóleıttený qaýpi áli de seıilmeı otyr. Bul jóninde QR Ekologııa jáne tabıǵı resýrstar mınıstri Erlan Nysanbaev Óńirlik ekologııalyq sammıtte málimdedi.
Ondaı qaýip elimizdiń ortalyq, ońtústik jáne batys aımaqtarynda baıqalady.
Ásirese, batys, ońtústik-batys jáne ońtústik-shyǵys óńirlerde qumdy daýyldar jıilegen. Mundaı negizgi oshaqtar retinde Aral mańyn, Moıynqumdy, Kaspııdiń soltústigin jáne Aqtóbe oblysyn ataýǵa bolady.
— Bul jerde áńgime jergilikti emes, anaǵurlym keń aýmaqty kamtıtyn ekologııalyq másele jóninde bolyp otyr, — dedi mınıstr.
Máseleniń uzaq merzimdi ári júıeli sheshimderi de qarastyrylǵan. Máselen, jerdiń tozýy men shóleıtenýin toqtatý jáne aldyn alý úshin orman jolaqtary paıda bolmaq. Olardyń eni 60–100 metr aralyǵynda bolady jáne qumdy daýyldar jıi soǵatyn aımaqtarda ósiriledi.
Atap aıtqanda, kelesi aýmaqtarda orman jolaqtary egiledi: Qarmaqshy — Áıteke bı tas joly boıyna; «Ortalyq — Batys» tas jolynyń Torǵaıdan Yrǵyzǵa jáne Yrǵyzdan Qarabutaqqa deıingi ýchaskelerinde; Shalqar — Qandyaǵash temirjoly boıyna; Jambyl, Qaraǵandy jáne Ulytaý oblystarynyń shekarasyndaǵy Moıynqum alabynda.
Joǵaryda jazǵanymyzdaı, orman jolaqtarynyń eni 60–100 metrge deıin jetedi. Qajet bolǵan jaǵdaıda, ıaǵnı qumdy daýyl qatty soǵatyn tustarda osyndaı birneshe jolaq parallel túrde qalyptastyrylady.
— Bul jobanyń birneshe salada tıimdiligi bar, — deıdi mınıstr.
Keńirek toqtalsaq, ekologııalyq paıdasy — jerdiń tozýy men shóleıttený kórsetkishin tómendetedi; ekonomıkalyq utymdylyǵy — aýyl sharýashylyǵy ónimderin ósirýge oń áserin tıgizedi; áleýmettik tıimdiligi — jańa jumys oryndary ashylady jáne halyqtyń ómir sapasyn jaqsartady; ınfraqurylymdyq paıdasy — tas joldar men temirjol jelilerin, logıstıkalyq dálizderdi qorǵaıdy.
Aıta keteıik, buǵan deıin Aral mańyndaǵy ekologııalyq ahýal qalaı ekenin jazǵanbyz.
