Aptap ystyq, shańdy daýyl, burshaq: 8 mamyr kúni aýa raıy qandaı bolady

ASTANA. KAZINFORM — «Qazgıdromet» RMK sınoptıkteri 8 mamyrǵa arnalǵan aýa raıy boljamyn jarııalady. 

Sınoptıkterdiń boljamyna sensek, respýblıkamyzdyń shyǵysynda ǵana jaýyn-shashynsyz aýa raıy kútiledi.

— Ońtústik tsıklonnyń júrýine baılanysty Qazaqstan aýmaǵynyń basym bóliginde aýa raıynyń turaqsyz sıpaty kútiledi: naızaǵaı oınap, burshaq jaýady, soltústik-batys óńirde nóser jańbyr bolady… Respýblıkamyz boıynsha ortaq tabıǵı qubylys — jeldiń kúsheıýi, elimizdiń ońtústiginde shańdy daýyl turady dep boljanady. Túnde jáne tańerteń elimizdiń soltústiginde, soltústik-batysynda tuman túsedi. Kúndiz Almaty, Jambyl oblystarynyń ońtústik-batysynda qatty ystyq bolady, — dep habarlady «Qazgıdromet» RMK.