Shandaqsor sý qoımasynda balyq qyryldy: shyǵyn kólemi 1,2 mln teńgeden asady

PAVLODAR. KAZINFORM - Mamandar Ekibastuzdaǵy №2 GRES stansasyna qarasty Shandaqsor sý qoımasynan 521 kılogram ólgen balyq jınap aldy.

Bul týraly «Zaısan-Ertis oblysaralyq basseındik balyq sharýashylyǵy ınspektsııasy» RMM Pavlodar oblysy boıynsha balyq ınspektsııasy bóliminiń basshysy Samal Temirbolatova Kazinform tilshisine habarlady.

- Arnaıy qurylǵan komıssııa 22 mamyr kúni Shandaqsor sý qoımasynda bolyp, jınap alynǵan óli balyqtyń jalpy salmaǵy 521 kılogram (torta, taýtan, alabuǵa) ekeni anyqtaldy. Al sý janýarlary dúnıesine keltirilgen shyǵyn kólemi - 1 229 143,2 teńge. Ekibastuz qalalyq sanıtarlyq-epıdemıologııalyq baqylaý basqarmasynyń ókilderi sýdan, al veterınarlyq stansa mamandary qyrylǵan balyqtan synamalar aldy. Synamalar zerthanalarǵa jiberildi. Nátıjesi shamamen bir aptadan soń belgili bolady, - dedi Samal Baltashqyzy.

Mamandar balyqtyń qyrylýy sýdaǵy joǵary temperatýranyń saldary (shamamen) bolýy múmkin degen aldyn ala boljam jasap otyr. Sý qoımasyndaǵy temperatýrany ólsheý barysynda ol normalyq shekte - 26-27ºS bolǵan. 

«Zaısan-Ertis oblysaralyq basseındik balyq sharýashylyǵy ınspektsııasy» Pavlodar oblysy polıtsııa departamentine atalǵan oqıǵaǵa kináli tulǵalardy anyqtaý jáne jaýapkershilikke tartý týraly hat jóneltti.

Buǵan deıin Ekibastuzdaǵy Shandaqsor sý qoımasynda balyq qyrylyp jatqany týraly jazǵan edik.