Shámshiniń shyǵarmashylyq keshinde jańa áni oryndaldy
ASTANA. QazAqparat - Qazaqtyń birtýar talanty, vals koroli, sazger Shámshi Qaldaıaqovtyń esh jerde aıtylmaǵan jańa áni tabyldy, dep habarlaıdy Habar24kz.
Shámshiniń «Kóktem áni» shyǵarmasy alǵash ret Almatyda ótken sazgerdiń shyǵarmashylyǵyna arnalǵan kontsertte oryndaldy.
Keshtiń taǵy bir ereksheligi Shámshi eńbekterin opera ánshileri jandy daýysta shyrqady. Bul ánniń qoljazbasyn Shámshi Qaldaıaqov kózi tirisinde KSRO-nyń halyq ártisi Roza Jamanovaǵa bergen eken. Jyldar ótip, muraǵatynda jatyp qalǵan ándi Roza apamyz ómirden óterinde shákirti, opera ánshisi Balapan Jubaevaǵa amanattaıdy. Qolyna túsken týyndyny zerttep, zerdelegen ánshi bul ánniń esh jerde oryndalmaǵanyna jáne ánde Shámshi Qaldaıaqovtyń ózindik máneri, qoltańbasy bar ekenine kóz jetkizedi. Qaıta jańǵyrǵan án sazgerdiń shyǵarmashylyǵyna arnalǵan keshte alǵash ret oryndaldy.
«Ákemniń ánderi ár qazaqtyń qulaǵynda. Ánniń bir sózin estise boldy, ilip alyp, birge shyrqaıdy. Shámshi shyǵarmashylyǵynyń ereksheligi osy. Onyń ánderi halyqtyń súıiktisine aınaldy. Búgin oryndalǵan jańa án de tyńdarmannyń júreginen oryn alary sózsiz»,-deıdi Sh.Qaldaıaqovtyń uly, Abaı atyndaǵy Memlekettik akademııalyq opera jáne balet teatry dırıjeri Muhtar Qaldaıaqov.
Birneshe urpaqty lırıkalyq týyndylarymen sýsyndatyp kele jatqan Shámshi ánderin óz repertýaryna qospaǵan ánshi kemde-kem. Bul keshte Abaı atyndaǵy opera jáne balet teatrynyń ánshileri tyńdarmannyń júreginde jattalyp qalǵan ánderdi ózgeshe óńmen, orkestrdiń súıemeldeýimen tabıǵı daýysta shyrqady.
«Bul ánder - meniń ózime ónerge joldama bergen ánder. Baıaǵyda 1993-1994 jyldary Shymkent qalasy men Jambyl qalasynda eki ret osy Shámshi aǵamyzdyń ánderiniń konkýrsy ótti. Sol kezde osy ánderdi aıtyp, laýreat bolǵanmyn». Abaı atyndaǵy MAOBT jetekshi solısi Gúlzat Dáýirbaeva.
