Shámshiniń «Meniń Qazaqstanym» áni AQSh-ta oryndaldy

NUR-SULTAN. QazAqpart –Shámshi Qaldaıaqovtyń «Meniń Qazaqstanym» áni Bostonda oryndaldy, dep habarlaıdy QazAqparat.

Bostondaǵy Garvard ýnıversıteti alańynda oryndalǵan «Meniń Qazaqstanym» ániniń vıdeosyn AQSh-tyń Qazaqstandaǵy Elshiligi jarııalady.

«Áıgili kompozıtordyń mýzykasyn búkil álem tyńdasyn. Garvard ýnıversıteti, Boston, 2017 jyl, mamyr. Vıdeo tıtry: Elnýra Abakan», - delingen Elshilik paraqshasynda.

Eske sala ketsek, búgin aty ańyzǵa aınalǵan sazger, qazaq valsiniń koroli Shámshi Qaldaıaqovtyń týǵanyna 90 jyl toldy. Sazgerdiń uly Muhtar Qaldaıaqov halyq ártisiniń ómiri men otbasylyq qundylyqtary týraly aıtyp berdi.

QR Mádenıet jáne sport mınıstrliginiń uıymdastyrýymen «Meniń Qazaqstanym» halyqaralyq mýzykalyq chellendji bastaldy. Áýendi marafon Qazaqstannyń halyq ártisi, QR Ánurany áýeniniń avtory Shámshi Qaldaıaqovtyń týǵan kúnine arnaldy.

Túrkistan oblysynyń Otyrar aýdanynda týyp-ósip, «qazaq valsiniń koroli» atanǵan Shámshi Qaldaıaqovqa týǵan jerinde mýzeı ashyldy.

Sondaı-aq, QR Prezıdenti Qasym-Jomart Toqaev: «Búgin elimizdiń Ánurany «Meniń Qazaqstanym» ániniń avtory, ult rýhanııatyna talaı syrly saz ben ásem áýen syılaǵan kompozıtor Shámshi Qaldaıaqovtyń týǵanyna 90 jyl toldy. Shámshi shyǵarmashylyǵy – ulttyń baǵa jetpes baılyǵy. Onyń týyndylaryn keńinen nasıhattaý – búgingi urpaqtyń paryzy», dep jazdy Twitter-degi paraqshasynda.