Shámshiniń 300-ge jýyq áni bar degen derekti balasy joqqa shyǵardy
ASTANA. QazAqparat - Ultymyzdyń birtýar kompozıtory Shámshi Qaldaıaqovtyń 300-ge jýyq áni bar dep esepteledi. Balasy Muhtardyń aıtýynsha, Shámshi osynshama án jazbaǵan, dep habarlaıdy «Astana aqshamy» basylymy.
«2010 jyly ánjınaǵyn shyǵardyq. Oǵan 55 án engizildi. Kózi tirisinde ákem «Jaqsy kompozıtor bolý úshin kóp án bilý kerek» dep aıtyp otyratyn. Ózi de 300-ge jýyq ándi jatqa bildi. Sondyqtan, 300-deı án jazdy dep aıtýǵa kelmeıdi, ol osynshama ándi bilgen» dedi Muhtar Qaldaıaqov Astana qalasy ákimdiginiń qoldaýymen ótkizilgen «Ánim sen ediń» kontsertiniń aldyndaǵy baspasóz máslıhatynda. Kontsertte Shámshiniń elge súıikti ánderimen qatar jaryqqa shyǵa qoımaǵan ánderi de aıtylady delindi. Belgili ánshi Jubanysh Jeksenuly osydan birneshe jyl buryn vals koroliniń «Arqalyqtyń aq tańy» jáne «Súımegender saǵynbaıdy» ánderin jańǵyrtqan edi. Sol sekildi Shámshiniń «Jarqyraıdy Jezqazǵan» atalatyn halyqqa jetpeı júrgen taǵy bir áni bar eken. Bul týyndyny Serke Qojamqulov atyndaǵy Jezqazǵan sazdy-drama teatrynyń akteri Dúısen Kenjeev 1992 jyly Shymkentte ótken Shámshi Qaldaıaqov ánderiniń alǵashqy festıvalinde oryndap, «Shámshi Qaldaıaqovtyń jańa áni» nomınatsııasynda jeńimpaz atandy. Akterdiń osy ándi dúıim jurttyń aldyna shyǵarýyna óndeýge ketetin qarjy qolbaılaý bolyp tur. Jubanyshqa «Jarqyraıdy Jezqazǵan» ániniń baǵyn jandyrýǵa usynys tastaǵanymyzda: «Án unasa, oryndaýǵa daıynmyn» degen jaýabyn estidik. Taǵy bir tyń shyǵarma jaıly halyq ártisi Roza Rymbaeva aıtty. «Ol - jalǵyz, biz - ekeýmiz» degen Shámshi aǵamyzdyń oryndalmaı ketken ánin kontsertte aıtamyn. Sózin Nursultan Álimqulov jazǵan. Bul ándi tyńdaýshylar umytyp ta ketken shyǵar. Bala kezimde tyńdaǵan ánim edi. Muny endi birinshi ret oryndamaqpyn», - dedi ol. Sonymen qatar, dańqty ánshi 1975 jyly Uly Jeńistiń 30 jyldyǵyna arnalǵan Jas oryndaýshylar baıqaýyna qatysyp, birinshi oryn alǵanyn, sol kezde qazylar alqasynyń tóraǵasy Shámshi Qaldaıaqov bolǵanyn eske aldy. Shámshi Qaldaıaqovtyń ata-babalary Qaraǵandy oblysynyń Jańaarqa aýdanyn mekendegen degen derekti belgili óner zertteýshisi, kompozıtor Іlııa Jaqanovtan estigen edik. Osy sózge ónertanýshy Erlan Tóleýtaı da qosylyp júr. Muhtar Qaldaıaqov ol jóninen habarsyz bolyp shyqty. «Bizdiń rýymyz - Jaǵalbaıly, atamekenimiz - Batys Qazaqstanda dep esepteımin» dedi ol. Qaı jaqtan bolsa da, Shámshi Qaldaıaqov qazaqtyń daryndy uly, halqymyzdyń súıikti kompozıtory.
