Shámshıdınova «biz bilmeıtin» mamandyqtardy jarııalady
ASTANA. QazAqparat - Aldaǵy ýaqytta mamandyqtardyń mazmuny men sapasy transformatsııaǵa ushyraıdy, al keıbir mamandyqtar múldem joıylady. Sonyń ornyna jańa mamandyqtar keledi. Búgin Astanada ótken jıynda «Nazarbaev zııatkerlik mektepteri» AQ basqarma tóraıymy Kúlásh Shámshıdınova birqatar jańa mamandyqtarǵa toqtaldy, dep habarlaıdy QazAqparat tilshisi.
Onyń aıtýynsha, búginde álemdik ekonomıkadaǵy ózgerister eńbek naryǵyna da áser etip otyr.
«Dúnıejúzilik ekonomıkalyq forýmynyń esebine sáıkes, dál qazir mańyzdy bolyp sanalatyn qarim-qabiletterdiń 35 paıyzy nebári bes jyldan keıin túbegeıli ózgeredi. Mamandyqtardyń mazmuny men sapasy transformatsııaǵa ushyraıdy, al keıbir mamandyqtar múldem joıylady. Sonyń ornyna jańa mamandyqtar keledi. Atalǵan ózgerister adam ómiriniń san salasyn qamtıtyn bolady. Demek, bizge ondaı ózgeristerge daıyn bolý qajet, otandyq bilim berý salasy árbir qazaqstandyqtyń ómirde ǵana emes, eńbek naryǵynda da óz ornyn tabýǵa kómektesýi kerek», - dedi Shámshıdınova bıylǵy Joldaýǵa arnalǵan jıynda.
Onyń sózine qaraǵanda, búginde reseılikter jańa mamandyqtardyń atlasyn ázirlep qoıdy. Oǵan sáıkes, jaqyn arada molekýlıarly dıetolog, «tiri júıelerdiń» sáýletshisi, kıberprotezderdi ázirleýshi, GMO agronom, energojúıeler dızaıneri, ıntellektýaldy energııa jelileriniń ınjeneri, aqyldy joldardy salýshy, ǵarysh týrızmi boıynsha menedjer, ǵarysh joldarynyń ınjeneri, robottardy basqarýǵa arnalǵan neıroınetrfeısterdi jobalaýshy, zııatkerlik menshikti baǵalaýshy, elektrondy kıim-keshek retsepteriniń jobalaýshysy, oı-órisiniń prodıýsseri jáne taǵy basqa mamandyqtarǵa suranys artady.
«Qazirdiń ózinde atalǵan mamandyqtarǵa suranys bar. Soǵan qarap, biz bilim alǵan baǵdarlamalardyń tarıxtyń enshisinde qalyp, eskirgenin túsinýge bolady. Osy oraıda taǵy bir statıstıkany keltireıin, aldaǵy 25 jylda damyǵan memleketterde adamdardyń jumyssyz qalý kórsetkishi 47 paıyz jetedi. Bul degenimiz, bári avtomattandyrylady. Demek, ol adamdar óz mamandyǵyn ózgertýge daıyn bolýy tıis. Osy jerde ómir baqı bilim alýdyń mańyzdylyǵy arta túsedi. Budan qandaı qorytyndy shyǵady? Búginde adamnyń bir ret bilim alǵany jetkiliksiz. Ol protsess úzdiksiz júrýi kerek. Mine, osyǵan baılanysty qazirden bastap balalardyń syndarly oılaý qabiletin damytý asa mańyzdy. Olar ózdigimen aqparat izdep, naryq talaptaryna beıimdele bilýi kerek», - dep atap kórsetti Shámshıdınova.
Aıta keteıik, burynǵy Bilim jáne ǵylym mınıstri Aslan Sárinjipov te eńbek naryǵynda biraz ózgeristerdiń bolatyny jaıynda aıtqan bolatyn. Sol kezde xalyq arasynda ony «biz bilmeıtin mamandyqtar paıda bolady» degen sózi úshin kelemejge aınaldyrǵan.
