Shámshi Qaldaıaqovtyń mereıtoıyna oraı el óńirlerinde ótetin sharalar
Atap aıtqanda, mereıtoı Qurmanǵazy atyndaǵy Qazaq memlekettik akademııalyq halyq aspaptary orkestri ázirlegen Halyqaralyq Shámshi ánderi festıvaliniń onlaın-kórsetilimimen bastaý alady.
Otyrar aýdanynyń Shámshi Qaldaıaqov týǵan ólkesinde búgin saǵat 15:00-de kompozıtor ómirge kelgen, qaıta jańartylǵan mýzeı-úıiniń ashylý saltanaty ótedi. Ashylý saltanatynda Mádenıet jáne sport mınıstri Aqtoty Raıymqulova, Túrkistan oblysynyń ákimi Ómirzaq Shókeev jáne kompozıtordyń uly Muhtar Qaldaıaqov qatysady. Keıinnen osy jerde kompozıtordyń eskertkishine saltanatty gúl qoıý rásimi bolady.
Aıtýly kúni «Qazaqkontsert» memlekettik kontserttik uıymy» janyndaǵy «Kontserttik-gastroldik qyzmet ortalyǵy» «Meniń Qazaqstanym» halyqaralyq mýzykalyq chellendjiniń tusaýyn kesip, jyl sońyna deıin jalǵastyrmaq. Bul mýzykalyq marafonǵa qazaqstandyq belgili ártister men akterler, sportshylar men memleket jáne qoǵam qaıratkerleri, alys-jaqyn shet elderdegi qandastarymyz ben kúlli otandastarymyz atsalysady dep kútilýde.
Sondaı-aq Mádenıet jáne sport mınıstrliginiń Youtube arnasy arqyly «Jaz áýenderi» jobasy aıasynda Kenen Ázirbaev atyndaǵy Jambyl oblystyq fılarmonııasynyń «Án padıshasy – Shámshi aǵa» atty onlaın-kontserti kórermenderge usynylmaq.
Uly mýzykanttyń shyǵarmashylyǵyn jaqsy kóretinder mınıstrliktiń Youtube arnasynda Jambyl atyndaǵy Qazaq memlekettik fılarmonııasynyń «Qazaq valsiniń koroli» kontsertin kóre alady.
Mereıtoılyq sharalar kezegin Nur-Sultan qalasyndaǵy QR Ulttyq akademııalyq kitaphanasy jalǵastyryp, el nazaryna «Qazaq valsiniń koroli – Shámshi Qaldaıaqov» vırtýaldy onlaın-kórmesin usynady. Odan basqa, QR Ulttyq kitaphanasynyń áleýmettik jelilerindegi resmı paraqshalarynda Shámshi Qaldaıaqovtyń ánderinen «Meniń Qazaqstanym» atty kontserti ótedi.
Sh. Qaldaıaqovtyń 90 jyldyǵyn merekeleý sharalaryna Zaǵıp jáne kórý qabileti tómen azamattarǵa arnalǵan respýblıkalyq kitaphana da atsalysady. Uıym kórermenderge «Án-aǵa» atty ádebı-mýzykalyq kesh uıymdastyrmaq. Keıinnen oqyrmandarǵa «Qazaqstannyń halyq artisi Shámshi Qaldaıaqovtyń týǵanyna 90 jyl» atty mýzykalyq vıdeo-dárisin syılamaq.
Aıta keteıik, bıyl kompozıtordyń mereıtoıyn merekeleýge arnalǵan mınıstrliktiń memlekettik áleýmettik tapsyrysy aıasynda tuńǵysh ret Qazaqstan sýretshileriniń shyǵarmashylyq jumystary negizinde «Shámshi álemi» atty onlaın mýltımedııalyq kórme uıymdastyrylady. Joba nátıjesinde shyǵarmashylyq jumystardyń katalogyn shyǵarý kózdelgen.
Atalmysh joba aıasynda Shámshi Qaldaıaqovtyń shyǵarmashylyǵy men qazaq án ónerinde qaldyrǵan aýqymdy murasy elimizdiń barlyq óńirlerinen jınalǵan sýretshilerdiń týyndylarynda beınelenetin bolady.
Odan bólek respýblıkalyq mýzeıler men kitaphanalar shette qalmaıdy. Ózderiniń áleýmettik jelidegi paraqshalarynda kórermender nazaryna kompozıtordyń ómirine arnalǵan vırtýaldyq kórmeler men onlaın-lektsııalaryn usynbaq.
Máselen, 15 tamyz kúni Qazaqstan Respýblıkasynyń Ulttyq mýzeıiniń resmı paraqshalarynda rejısser, stsenarıst, ánshi-kompozıtor Oralbek Sarybasovpen mýzykalyq onlaın-suhbat ótedi. Sondaı-aq mýzeıdiń onlaın kórermenderiniń arasynda kompozıtordyń ómiri men shyǵarmashylyǵyna arnalǵan Muzei Time test-saýalnamasy uıymdastyrylmaq.
Merekelik baǵdarlama bunymen toqtap qalmaıdy.
17 tamyz kúni QR Ulttyq mýzeıiniń qoryndaǵy Sh. Qaldaıaqov murasy týraly beınesıýjet shyǵyp, 26 tamyzda «Qazaq mýzyka tarıhyndaǵy biregeı tulǵa» atty beıneekskýrsııa, Nur-Sultan qalasyndaǵy QR Ulttyq akademııalyq kitaphanasynyń uıymdastyrýymen «Qazaq valsiniń koroli – Shámshi Qaldaıaqov» vırtýaldy kórmesi uıymdastyrylmaq.
Mereıtoı kúninen keıin de is-sharalar jalǵasyn tabady.
23 qazan kúni Qurmanǵazy atyndaǵy Qazaq memlekettik akademııalyq halyq aspaptar orkestri «Vals koroli» kontsertin kórermender nazaryna usynady. Aǵymdaǵy jyldyń qazan aıynda Abaı atyndaǵy Qazaq memlekettik opera jáne balet teatry kompozıtordyń shyǵarmalaryn nasıhattaıtyn kontsertin, al qarasha aıynda Jambyl atyndaǵy Qazaq memlekettik fılarmonııasy kompozıtordyń shyǵarmashylyǵyna arnalǵan mereıtoılyq kontsert ótkizedi. Sonymen qatar, aǵymdaǵy jyldyń qarasha aıynda «Qazaqkontsert» Memlekettik kontserttik uıymynyń «Saz & Soul» vokaldy-aspaptyq toby óz kórermenderin áleýmettik jelilerde jarııalanatyn merekelik kontsertimen qýantady.
El óńirlerindegi fılarmonııalar men shyǵarmashylyq ujymdar áıgili kompozıtordyń mereıtoıyn merekeleýge úles qosatynyn atap ótken jón.
Osylaı, Túrkistan obylysynda epıdımııalogııalyq jaǵdaıǵa baılanysty onlaın formatynda ótetin jyl sońyna deıin 100-ge jýyq is-shara josparlanyp otyr.
