Shámshi Qaldaıaqovqa týǵan jerinde mýzeı ashyldy
TÚRKІSTAN OBLYSY. QazAqparat - Túrkistan oblysynyń Otyrar aýdanynda týyp-ósip, «qazaq valsiniń koroli» atanǵan Shámshi Qaldaıaqovqa týǵan jerinde mýzeı ashyldy, dep habaraıdy QazAqparat óńirlik kommýnıkatsııalar qyzmetine silteme jasap.
Atalǵan shara uly kompozıtordyń 90 jyldyq mereıtoıyna arnaldy. Qazaq rýhanııaty úshin eleýli merekege QR Mádenıet jáne sport mınıstri Aqtoty Raıymqulova jáne oblys basshysy Ómirzaq Shókeev arnaıy kelip, mýzeımen tanysty
«Shámshi Qaldaıaqov - qalyń qazaqtyń sheksiz súıispenshiligine bólengen, ulttyq ən ónerinde aıryqsha iz qaldyrǵan seri sazger, qazaq valsiniń koroli. Dúıim jurt moıyndaǵan biregeı óner ıesi - egemendigimizdiń aıbary sanalatyn ənuran mýzykasynyń avtory. Syrshyl sezimge qurylǵan lırıkalyq ásem týyndylar keleshekte de halyqpen birge máńgi jasaı bersin», - dedi A. Raıymqulova.
«Búgin aıtýly mereke. Shámshi Qaldaıaqovtyń týǵanyna 90 jyl tolyp otyr. Alaıda, osy oblysqa kelgeli Shámshiniń kindik qany tamǵan jerde Shámshige arnalǵan mýzeıdiń joq ekenin bildim. Tipti bizdiń búkil respýblıkada «Qazaq valsiniń koroline» arnalǵan birde-bir mýzeı joq. Az ýaqyt ishinde ketken kemshiliktiń ornyn toltyrý úshin tapsyrma berip, demeýshiler esebinen Shámshi mýzeıiniń ashylýyn qolǵa aldyq. Shámshi mýzeıi – Jıdebaıdaǵy Abaı mýzeıi sekildi jas kompozıtorlar men jas ánshiler táý etetin zııarat ornyna aınalýy tıis», dedi Ómirzaq Shókeev.
Atap óteıik, bul nysan Shámshiniń kózin kórgen, onyń ómirine qanyq azamattar esteligin esepke ala otyryp salyndy.
Mýzeı ishinde uly kompozıtordyń ózi qoldanǵan buıymdary, saz shyǵarýǵa sep bolǵan mandolınasy sekildi qundy jádigerler bar. QR Ulttyq mýzeıi Shámshiniń jańadan ashylǵan mýzeıine kompozıtordyń bas kıimin ákelip tartý etti.
Shámshi muraǵatyn kútip-baptaý úshin mekeme oblystyq mýzeıdiń fılıaly retinde ashylyp, arnaıy shtat sanymen mamandar jumys isteıtin bolady. Kelgen týrıster men qonaqtarǵa barlyq jaǵdaı jasalady.
Óskeleń urpaqqa Shámshini nasıhattaý jumystary munymen toqtap qalmaıdy. Eń aldymen oblys ortalyǵyndaǵy jańa mýzyka mektebine Shámshi Qaldaıaqov esimi berilse, mýzyka mektebiniń aldynda eńseli eskertkishi boı kóteredi. Sondaı-aq, Túrkistan qalasyndaǵy kóshelerdiń biri sazger esimimen atalady.
