Shámshi Qal­daıaqovtyń «Kýban» erekshe murasy Ulttyq mýzeıge tapsyryldy

ASTANA. QazAqparat - «Ulttyq mýzeıge syı-tartý» sharasy qolǵa alynǵaly beri murajaı qory elimizdiń qoǵam jáne mádenıet qaıratkerleriniń nebir qundy jádigerlerimen tolyǵýda. Endi olardyń qataryna qazaq valsiniń koroli atanǵan Shámshi Qal­daıaqovtyń pıanınosy da qosyldy.

Astana aqshamy gazetiniń jazýynsha, mýzeı qoryna tapsyrylǵan dúnıe - uly sazger Shámshi Qal­daıaqovtyń «Kýban» dep atalatyn pıanınosy. Bul mýzykalyq aspapty kompozıtorǵa 1965 jyldyń 4 aqpanynda Shymkent jastary syıǵa tartqan.

Jalpy, bala jasynan mýzykaǵa qumar bolǵan Shámshi pıanınoda oınaýmen qatar dombyra shertip, syrnaıdy da tartqany aıtylady. Aýylyna kelgen syǵan jigitinen mandolınany satyp alǵany jaıly da derek bar. Qazaqstannyń eńbek sińirgen qaıratkeri Altyn Imanbaeva Shámshi mekteppen qosh­tasý keshinde Latıf Hamıdıdiń «Bulbul» ánin mandolınamen oryndap, aýyldastarynyń aldynda mereıi óskenin jazady.

Aıta keteıik, kompozıtor bul mýzykalyq aspapty syıǵa alǵan jyly Qazaqstan Komsomoly syılyǵymen marapattaldy. Al 1991 jyly Halyq ártisi atandy. Kompozıtordyń ǵumyry osydan 26 jyl buryn osy aqpan aıynda úzildi. Ómiriniń sońǵy jyldary kıgen qarakól bórigi de Astanadaǵy mýzeıde saqtaýly.

Shámshi Qaldaıaqov (1930-1992 jj) - asa kórnekti sazger, án janrynyń áıgili maıtalmany, Qazaqstan mádenıetine eńbegi sińgen qaıratker, osy zamanǵy qazaq estradasynyń negizin salýshylardyń biri, Qazaqstannyń halyq ártisi.

Ońtústik Qazaqstan oblysynyń Qyzylqum aýdanynda dúnıege keldi. Bala kezinen boıyndaǵy bar talantyn alqaly jıyn, alaman báıgelerde kórsete bildi. 1950 jyldan bastap shyǵarmashylyqpen túbegeıli túrde shuǵyldandy.

Kompozıtordyń «Aq erke - Aq Jaıyq», «Arys jaǵasynda», «Syr sulýy», «Jarqyraıdy Jezqazǵan», «Qarqaraly», «Moıynqumda», «Meniń Qazaqstanym», «Teńizde - tolqynda», «Aqmańdaılym», «Aq bantık», «Keshikpeı kelem dep eń», «Ánim sen ediń» syndy orny erekshe 300-ge jýyq áni bar.