Shámshi Qaldaıaqovtyń ánderi Nıý-Iorkte alǵash ret shyrqaldy
ASTANA. KAZINFORM — Qazaqstan Respýblıkasynyń Ulttyq merekesine arnalǵan kontsertte qazaqtyń kórnekti kompozıtory, Qazaqstannyń halyq ártisi Shámshi Qaldaıaqovtyń shyǵarmalary Nıý-Iork turǵyndarynyń ystyq yqylasyna bólendi, dep habarlaıdy Kazinform agenttiginiń menshikti tilshisi.
Manhettendegi «The DiMenna Center for Classical Music» kontsert zalynda Shámshi Qaldaıaqovtyń 20 tańdaýly áni oryndalǵan «The World of Shamshi» kontserti ótti. Shyǵarmalar qazaq jáne aǵylshyn tilderinde shyrqaldy. Bul zalda klassıkalyq mýzyka oryndaýshylary men orkestrler óner kórsetip, kameralyq kontsertter ótedi.
«Ánim sen ediń», «Ana týraly jyr», «Qaıdasyń», «Syr sulýy», «Baqyt qushaǵynda» syndy tanymal ánderdi Abaı atyndaǵy Qazaq ulttyq opera jáne balet teatrynyń jetekshi solısteri Madına Erlanova, Tahaýı Rahmetov, Damır Sadýaqasov, Farhat Kýbıev jáne pıanıst-kontsertmeıster Alııar Ótetileý oryndady.
Kontsertte kompozıtordyń uly Muhtar Qaldaıaqov pen nemereleri Abaı jáne Nursultannyń óner kórsetýi erekshe áser qaldyrdy. Іs-sharany «Shámshi álemi» qoǵamdyq qory Bolat Ótemuratov qory men Qazaqstannyń Nıý-Iorktegi Bas konsýldyǵynyń qoldaýymen uıymdastyrdy.
Amerıkalyq kórermender qazaq mýzyka mádenıetimen áıgili kompozıtor Shámshi Qaldaıaqovtyń 100 jyldyǵyna oraı uıymdastyrylǵan «Shamshi 100» halyqaralyq mádenı jobasy aıasynda tanysty. Nıý-Iork – kompozıtordyń shyǵarmashylyq murasy tanystyrylǵan úshinshi iri qala.
Buǵan deıin 21 qazanda Madrıdtegi «Auditorio Nacional de Música» kontsert zalynda Shámshi Qaldaıaqovtyń ánderi alǵash ret ıspan tilinde shyrqalsa, 24 qazanda Parıjdegi organ zalynda kompozıtordyń shyǵarmalary frantsýz tilinde oryndaldy. Eki kontsert te joǵary deńgeıde ótti.
Shámshi Qaldaıaqov 300-den astam án jazyp, árqaısysyna ózindik órnek pen tarıh syılady. Onyń 1956 jyly jazylǵan «Meniń Qazaqstanym» áni keıin elimizdiń memlekettik Ánuranyna aınaldy.
2017 jyldyń mamyrynda kompozıtordyń 90 jyldyǵyna oraı Bostondaǵy Garvard ýnıversıtetiniń alańynda Shámshi Qaldaıaqovtyń «Meniń Qazaqstanym» áni oryndaldy.
Shámshi Qaldaıaqovtyń ánderi qazaq mýzykasyn amerıkalyqtarǵa tanytyp, eki eldiń mádenı baılanysyna jol ashty.
Eske sala keteıik, buǵan deıin «HasSaq» qazaq etno-folklorlyq ansambli Vashıngtonda Qazaqstan Táýelsizdiginiń 35 jyldyǵyna jáne AQSh
Táýelsizdiginiń 250 jyldyǵyna arnalǵan kontsert ótkizgenin habarlaǵan bolatynbyz.
