Shámshi Qaldaıaqov atyndaǵy Mádenıet úıi Jetekshi aýylyna jańa serpin berdi
PAVLODAR.KAZINFORM - Pavlodar oblysyndaǵy Jetekshi aýylynda kórnekti kompozıtor, qazaq valsiniń koroli Shámshi Qaldaıaqovtyń esimi berilgen jańa Mádenıet úıi aýyl ómirine tyń serpin ákeldi.
Aýyl turǵyndary men mádenıet salasynyń qyzmetkerleri bul nysannyń ashylýyn óńir úshin mańyzdy oqıǵa retinde baǵalap otyr. Mádenıet úıiniń dırektory Baǵdat Satımovtyń aıtýynsha, jańa ǵımarat ashylǵan sátten bastap aýyl turǵyndarynyń bas qosatyn mádenı ortalyǵyna aınalǵan.
– Ǵımarat shyǵarmashylyq jumystarǵa qajetti zamanaýı qural-jabdyqtarmen tolyq qamtylǵan. Munda mýzykalyq aspaptar, sahnalyq jaryqtandyrý júıesi, úlken LED-ekran ornatylǵan. Sonymen qatar jeldetý júıesi men órt qaýipsizdigi talaptaryna erekshe kóńil bólindi. Yńǵaıly grım bólmeleri, úıirmeler men stýdııalarǵa arnalǵan keń kabınetter qarastyrylǵan. Zamanaýı akýstıka kontsertter men qoıylymdardyń sapasyn arttyryp, kórermenge erekshe áser syılaıdy. Munyń bári aýyl turǵyndary úshin shynaıy mádenı ortanyń qalyptasýyna múmkindik beredi, – deıdi Baǵdat Satımov.
Jalpy aýmaǵy 1 500 sharshy metr bolatyn Mádenıet úıiniń qurylysy eki jylǵa sozyldy. Nysanda 300 oryndyq keń kórermen zaly bar.
Qazirgi tańda munda vokal, dombyra, horeografııa jáne qoldanbaly óner úıirmeleri jumys isteıdi. Balalar úshin mýltfılm kórsetilimderi uıymdastyrylsa, eresekterge kınoseanstar ótkiziledi. Sonymen qatar demalys kúnderi 80–90-jyldardaǵy tanymal ánderge arnalǵan mýzykalyq keshter ótedi.
Mádenıet úıi ujymy aldaǵy ýaqytta jańa jobalardy júzege asyrýdy josparlap otyr. Solardyń biri – aýyl turǵyndaryna arnalǵan «Aýyl keshi kóńildi» atty kontserttik baǵdarlama. Joba aıasynda otandyq estrada juldyzdaryn shaqyrý kózdelip otyr.
– Bul jobany jaz mezgilinde ótkizýdi josparlap otyrmyz. Qonaq bolatyn óner juldyzdarynyń esimderi ázirge qupııa, – dedi mádenıet úıiniń dırektory.
Sonymen qatar mádenıet úıinde Qazaqstannyń halyq ártisi, belgili kompozıtor Shámshi Qaldaıaqovtyń shyǵarmashylyǵyna arnalǵan án baıqaýyn ótkizý josparlanyp otyr.
– Baıqaýdy dástúrli túrde ótkizýdi kózdep otyrmyz. Alǵashqy kezeńi tek aýyl turǵyndary arasynda uıymdastyrylady. Shámshi Qaldaıaqovtyń úsh júzge jýyq áni bar, onyń shyǵarmalary qazaq estradasynyń altyn qoryna engen. Baıqaýdy sáýir aıynda ótkizýdi josparlap otyrmyz, – dedi Baǵdat Satımov.
Aıta keteıik, Jetekshi aýylyndaǵy Mádenıet úıiniń qurylysy aýyldyq aýmaqtardy keshendi damytý baǵdarlamasy aıasynda júzege asyryldy. Búginde aýylda úsh myńnan astam adam turady. Kóp jyldan beri turǵyndar suranysynda bolǵan mádenı nysan endi aýyldyń qoǵamdyq-mádenı ómiriniń negizgi ortalyǵyna aınalmaq.
