Shámshi ánderi el óńirlerinde shyrqaldy: ónerpazdar kompozıtordyń týǵan kúnine arnalǵan chellendjge qosyldy
ASTANA. KAZINFORM — 15 tamyz — qazaqtyń kórnekti kompozıtory, «qazaq valsiniń koroli» atanǵan Shámshi Qaldaıaqovtyń týǵan kúni. Osyǵan oraı elimizdiń ár óńirindegi ónerpazdar kompozıtordyń ánderin oryndap, chellendjge qosylyp jatyr.
Qyzylorda oblysy
Qyzylorda oblysynda chellendjdi oblystyq fılarmonııanyń ánshisi Gaýhar Bısekenova jalǵastyrdy. Ol Shámshi Qaldaıaqovtyń «Qaıdasyń» ánin shyrqady.
Ónerpaz áleýmettik jelidegi jazbasynda bul bastamanyń maqsaty kompozıtor ánderin oryndaýmen ǵana shektelmeıtinin atap ótti.
— Búgingi chellendj — uly kompozıtor murasyn jańǵyrtyp qana qoımaı, Shámshi ánderi arqyly ótken men búgindi, aǵa býyn men jas urpaqty jalǵaıtyn rýhanı kópir bolmaq. Endeshe, Shámshi álemine birge saıahat jasaıyq! Chellendjdi án álemindegi barsha óner ıelerine joldaımyz! Shámshi áni — halyq júreginde. Shámshi murasy — máńgilik áýen! — dep jazdy Gaýhar Bısekenova.
Óńirdegi mýzykalyq estafetany Jankent aýyldyq mádenıet úıiniń kásiporyn ádiskeri Talap Mýrzalıev te qoldady. Ol óziniń súıip tyńdaıtyn shyǵarmalarynyń biri — Shámshi Qaldaıaqovtyń «Ana týraly jyr» ánin oryndady.
Ónerpaz án arqyly qazaqtyń birtýar kompozıtorynyń shyǵarmashylyǵyna qurmet kórsetip, chellendjdi Laqaly aýyldyq klýbyna joldady.
Túrkistan oblysy
Túrkistan oblysynda Shámshi Qaldaıaqovtyń týǵan kúnine arnalǵan án chellendjin Ordabasy aýdandyq mádenıet úıiniń kórkemdik jetekshisi, oblystyq baıqaýlardyń laýreaty Berik Saǵatbekuly jalǵastyrdy. Ol kompozıtordyń «Arys jaǵasynda» ánin oryndady.
— 15 tamyz — Vals koroli, Án padıshasy Shámshi Qaldaıaqov aǵamyzdyń týǵan kúni. Osy mereke qarsańynda ánderinen chellendj jarııalaýdy bastaımyz, — dep jazdy ónerpaz.
Berik Saǵatbekuly án aıtý chellendjin barsha mádenıet qyzmetkerlerine joldady.
Estafetany Oranǵaı aýyldyq klýbynyń ánshileri de qabyldap, Shámshi Qaldaıaqovtyń «Keshikpeı kelem dep eń» ánin oryndady.
Aqmola oblysy
Shámshi ánderi Aqmola oblysynda da shyrqaldy. Tselınograd aýdandyq mádenıet jáne tilderdi damytý bóliminiń ókili Gúlaısha Amanjol chellendjge qosylyp, kompozıtordyń shyǵarmashylyǵyna arnalǵan mýzykalyq estafetany jalǵastyrdy.
Tselınograd aýdanynan óner qaıratkeri Salamat Muqashev te chellendjge ún qosty. Ol Shámshi Qaldaıaqovtyń anaǵa degen perzenttik mahabbatty arqaý etken «Ana týraly jyr» ánin oryndady.
Qaraǵandy oblysy
Qaraǵandy oblysynan chellendjge Osakarov aýdanynyń kompozıtory ári mýzykanty Anargúl Naýryzhan qosyldy. Ónerpaz Shámshi Qaldaıaqovtyń ánin oryndap, kompozıtor shyǵarmashylyǵyna arnalǵan estafetany jalǵastyrdy.
Qaraǵandy qalasyndaǵy Jańa Maıqudyq mádenıet úıiniń mýzykanty Musa Erden de Shámshi ánin oryndap, chellendjge qosyldy.
Osylaısha, Qyzylorda, Túrkistan, Aqmola jáne Qaraǵandy oblystarynyń ónerpazdary Shámshi Qaldaıaqovtyń týǵan kúnine oraı onyń ánderin qaıta shyrqap, mýzykalyq estafetany jalǵastyryp jatyr.
