Shamıl Alıaýtdınov: Vaktsınany nájiske teńeý – quran turǵysynan alǵanda aqymaqtyq

NUR-SULTAN. QazAqparat – Reseıdegi Máskeý memorıaldyq meshitiniń ımamy Shamıl Alıaýtdınov telejúrgizýshi Dınara Satjanmen ótkizgen Instagram-daǵy tikeleı efır kezinde vaktsınany nájiske teńep júrgen «ýaǵyzshylar» týraly pikir bildirdi, dep habarlaıdy QazAqparat tilshisi.

«Bizdiń zaman – ınternettiń zamany bolyp tur. Al ınternet saýaty joq adamdarǵa ún qatý múmkindigin berip otyr. Ótkende Reseıdiń eńbek ótili 15-20 jyldan asqan dinı ǵalymdary Kaırde halyqaralyq konferentsııaǵa qatysyp qaıttyq. Sol kezde arab ǵalymdary da aıtyp otyr. Qazir ınternette saýatsyz ýaǵyzshylar qaptap júr. Olardyń qudaıdy taný ilimi tereń bolmasa da, tilderi sheshen. Birneshe hadıs pen aıatty jattap alyp, sonyń kómegimen eldi aýzyna qaratady. Mysalǵa vaktsınany alsaq, oǵan qarsy nemese qoldaıtyn ustanymdy tańdap alady da, dinı teorııadan úzindini qıyp alyp, sony túrli jolmen taratyp, aınaldyrady. Osynyń kómegimen oqyrmandaryn kóbeıtip, tobyrdyń kóńil kúıine oınaıdy. Al resmı din ókilderi óıtip tobyrdyń, halyqtyń kóńil-kúıine oınaı almaıdy. Olardyń basty mindeti – aǵartý», - dedi máskeýlik ımam.

Dinı qyzmetker ınternet arqyly ıslam qundylyqtaryn burmalap túsindirýshilerdiń kóbeıýine naǵyz dinı bilim ıeleriniń áleýmettik jelige shyǵýǵa ýaqyty bolmaıtyny da áser etip otyrǵanyn aıtty.

«Eń bedeldi, eń saýatty dinı qyzmetkerler ınternette tanymal emes. Olar kitap shyǵaryp, dáris oqýy múmkin. Biraq ınetrentte tanymal emes. Bul óte úlken problema. Internet óte kóp ýaqyt pen kúshti, belgili bir qabiletterdi qajet etedi. Biz qazir sondaı bir kezeńdi bastan ótkerip jatyrmyz. Medıtsına iliminde, qudaıdy taný iliminde osy ınternettegi kórgensizdikti jeńe alamyz ba, joq pa degen másee týyndap tur», - deıdi ımam.

Sondaı-aq, ol vaktsınany nájiske teńeý qurannyń eshbir aıaty men súresine de qaıshy ekenin aıtty.

«Qoldan ósirgen sheıhter» adamdardyń emotsııasyna oınap, túrli tyıymdardy oılap taýyp jatyr. Onyń qýatyn elestete de almaısyz. Bul naǵyz aqparattyq bomba. Vaktsına –degen nájis dep tyıym aıta salady. Ony ilip áketip taratady. Bir sáttiń ishinde qaralym 100 myń, mıllıon bop ósedi. Al mazmunynda qurannan alǵan bir de bir argýment joq. Bastan-aıaq oıdan shyǵarylǵan. Mundaı janama, jalǵan tyıymdarmen kez kelgen dúnıege tyıym salyp tastaýǵa bolady. Vaktsınany nájiske teńeý – qurannyń da, súnnettiń de qaǵıdattarymen alyp qaraǵanda, aqymaqtyq. Kim oıdan shyǵarsa da, dál ýaqyttynda oılap shyǵarǵan. Aýzyńnan shyqqan sózdi adamdar kórip, qyzý talqylap jatsa, ádemi shyǵar. Biraq bul ótirik», - dedi Shamıl Alıaýtdınov.

Foto: www.facebook.com/salyautdinov