Shamıl Alıaýtdınov: Musylmandar meshit bolmaǵan jaǵdaıda shirkeýde qulshylyq ete alady
ASTANA. 16 mamyr. QazAqparat - Máskeý Memorıaldyq meshitiniń ımam-hatyby Shámil Alıaýtdınov meshit bolmaǵan jaǵdaıda musylmandardyń shirkeýde qulshylyq etýge bolatynyn aıtty. Bul týraly muslim.kz saıty jazdy.
«Shirkeýde namaz oqýǵa bolady ma?» degen saýalǵa ol buǵan tikeleı salynǵan tyıymnyń joǵyn alǵa tartty. Buǵan qosa, sahabalardyń hrıstıandardyń ǵıbadat úıinde qulshylyq etkeni týraly derektiń baryn tilge tıek etti.
«Ǵalymdar kóptegen aıattar men hadısterge súıenip, namazdy hramdarda, shirkeýlerde oqýǵa bolatyny týraly pátýa shyǵarǵan. Sahabalar men alǵashqy býynnyń ǵalymdary álemniń túkpir-túkpirin aralap júrip, meshit kezdespeıtin jerlerde hrıstıandardyń shirkeýlerinde qulshylyq etkeni jaıly derekter de barshylyq. Olardan bul jaıly suraǵanda «Budan qaýiptenetindeı eshteńe kórip turǵanymyz joq» dep jaýap qatqan», - dep jazypty din mamany óziniń saıtynda.
Imam Paıǵambarymyzdyń (s.a.s.) musylman úshin búkil jer beti meshit bolyp tabylady degen hadısin keltirgen eken. Eń bastysy, namaz oqıtyn jerińiz taza bolsa, bolǵany.
Onyń aıtýynsha, meshit jetispeıtin Reseı aýmaǵynda musylmandardyń shirkeýlerde namaz oqýyna ruqsat berý ózekti máselege aınalǵan.
Eýropanyń birqatar elderinde jamaǵaty bas suǵýdy qoıǵan shirkeýlerdi musylmandar juma namazyn oqý úshin paıdalanady. Osydan birneshe jyl buryn Túmen musylmandarynyń jetekshisi Fatyh Ǵarıfolla sol kezdegi Reseı pravoslav shirkeýiniń patrıarhy Alekseı ІІ-ge shirkeýde musylmandarǵa namaz oqýǵa ruqsat berýin suraǵan bolatyn. Ol osylaısha qoǵamnyń nazaryn osy máselege aýdarýdy jón kórgen.
Sóz bolǵan sol Túmende ıýdeılik jamaǵat sınagogada musylmandardyń namaz oqýyna ruqsat bergenin aıta ketý kerek.
