Shamań jetse, aqsha utyp al - 60 jastaǵy aqsaqal jastardy báske shaqyrdy
ASTANA. QazAqparat - Gımnastıkalyq jattyǵýlar jasaıtyn 60 jastaǵy aqtaýlyq aqsaqal jastardy jarysqa shaqyrdy, dep jazady Lada.kz.
Jeksen Aıýpovtyń gımnastıkalyq jattyǵýlar jasap jatqan vıdeosy talaıdy tań qaldyrdy. Ol kez kelgen adammen jarysqa túsýge daıyn ekendigin aıtty.
Jeksen Aıýpov 1958 jyly dúnıege kelgen. Bala kezinen sportty janyna serik etken azamat, kúres jáne jeńil atletıkamen aınalysqan. Ol ózi baǵyndyrǵan normatıvti qaıtalaı alatyn adamdy áli kezdestirmegenin aıtady.
«Biz túsirgen vıdeo jastardy menimen báske túsý úshin ázirlengen. Men rolıkpen jasalatyn jattyǵýdy 100 ret jasaımyn, osyny qaıtalaı alatyn Aqtaýda adam bar ma eken? Bazarda jumys isteımin. Kún saıyn men istegen jattyǵýlardy qaıtalaǵan adamǵa bás tigem. Bás quny 5 myń teńge. 10 ret jasasa boldy. Aqshany alǵysy keletinder kóp biraq oǵan árkimniń shamasy jete bermeıdi. Kóbi bir retten keıin qulap jatady»,-deıdi ol.
Sońǵy 10 jyl kóleminde Jeksen Aıýpov tańǵy altyda turyp 3-4 shaqyrym júgirgen soń 30 ret týrnıkke tartylady eken. Odan keıin úıine baryp mindetti túrde sýyq dýsh qabyldaıdy.
«Aqtaýlyqtardy menimen birge jattyǵý jasaýǵa shaqyramyn. Kez kelgen kólemdegi aqshany báske tigýlerińizge bolady. Menińshe 50 myńnan artyq eshkim tige almaıtyn shyǵar. Ózine sengender habarlassyn, men tek qýanamyn»,-deıdi Jeksen Aıýpov.
Jaman ádetterden boıyn aýlaq ustaıtyn Jeksen Aıýpov ómir boıy júrgizýshi bolyp jumys istegen.
