Shamamen 4,5 mlrd dollar: Túrkııa belsendi túrde ǵylymǵa qarjy quıa bastady

ASTANA. KAZINFORM — Túrkııa ǵylymǵa ınvestıtsııany jyldan jylǵa arttyryp jatyr, dep habarlaıdy Kazinform agenttiginiń menshikti tilshisi.

2024 jyly Túrkııada ǵylymı zertteýler men tájirıbelik-konstrýktorlyq jumystarǵa (ǴZTKJ) ortalyq bıýdjetten 178 mıllıard túrik lırasy (bul 4 mıllıard dollardan astam) bólindi. Bul týraly eldiń Statıstıka ınstıtýtynyń (TÜİK) «Ortalyq bıýdjettiń ǵylymı zertteýler men tájirıbelik-konstrýktorlyq jumystarǵa arnalǵan qarajattary men shyǵyndary – 2025» atty jańa esebinde aıtylǵan.

Jarııalanǵan derekterge sáıkes, ǴZTKJ-ǵa jumsalǵan shyǵyndar ortalyq bıýdjettiń jalpy kóleminiń 1,51%-yn jáne Túrkııanyń jalpy ishki óniminiń (JІÓ) 0,41%-yn qurady. 2024 jyly eldiń JІÓ 43 trln 410 mlrd 514 mln lıraǵa jetken.

Bul ǵylymı zertteýler men tehnologııalyq ázirlemelerdiń ulttyq saıasat pen ekonomıkadaǵy mańyzdylyǵynyń artyp kele jatqanyn kórsetedi. Úkimet Túrkııanyń halyqaralyq arenadaǵy básekege qabilettiligin arttyrýdy maqsat etip, ǵylymı áleýetti damytýǵa erekshe kóńil bólip otyr.

Sondaı-aq, 2025 jylǵa arnalǵan bastapqy bıýdjet josparlaryna súıene otyryp, TÜİK ǴZTKJ-ny qarjylandyrý odan ári ósip, 236 mlrd 262 mln lıraǵa jetedi dep boljaýda. Bul eldiń ınnovatsııalar, bilim berý, tsıfrlandyrý jáne tehnologııalyq táýelsizdik baǵytyn strategııalyq turǵyda qoldaıtynyn bildiredi.

Sarapshylar mundaı ınvestıtsııalar qorǵanys ónerkásibi, medıtsınalyq tehnologııalar, energetıka jáne aqparattyq tehnologııalar sekildi negizgi salalardyń damýyn edáýir jedeldete alady dep esepteıdi.

Buǵan deıin Túrkııa sheteldegi ǵalymdardy elge shaqyryp, aıyna shamamen 4 myń eýro (shamamen 2,5 mln teńge) jáne basqa da jomart bonýstar usynatyny týraly habarlaǵan edik.

Eske sala keteıik, Túrkııada jalǵan dıplomǵa qatysty aýqymdy qylmystyq shema áshkerelendi.