Shamamen 2300 adam Qazaqstannan Túrkııaǵa usha almaı otyr - IDM
ASTANA. QazAqparat - Túrkııadaǵy jaǵdaıǵa baılanysty, Astana, Almaty, Aqtaý, Qaraǵandy jáne Oral qalalarynan, barlyǵy 13 reıs keıinge shegerildi. Usha almaı qalǵan jolaýshylar sany shamamen 2300 adam.
Bul týraly jýrnalısterge shuǵyl brıfıng ótkizgen QR Investıtsııalar jáne damý vıtse-mınıstri Berik Qamalıev málim etti.
«Túrkııadaǵy jaǵdaıǵa baılanysty, biz Astana, Almaty, Aqtaý, Qaraǵandy jáne Oral qalalarynyń áýejaıynan 13 reısti keıinge shegerdik. Usha almaı qalǵan jolaýshylardyń sany shamamen 2300 adam. Eır Astana jáne Skat áýe kompanııalarynyń toǵyz reısi men tórt túrkııalyq áýe tasymaldaýshynyń reısteri keshiktirildi»,-dep habarlady B.Qamalıev.
Vıtse-mınıstrdiń aıtýynsha, Syrtqy ister mınıstrligimen keńes ótkizgen Azamattyq avıatsııa komıteti ázirge keshki saǵat 19.00-ge deıingi reısterdi keıinge qaldyrǵan.
«Qazir Syrtqy ister mınıstrligimen aqyldasa otyryp, aldyn ala saǵat keshki 19.00-ge deıingi reısterdi tolyq shegerdik. Saǵat 16.00-de jaǵdaıdy qosymsha baıandaımyz»,-dedi B.Qamalıev.
Esterińizge sala keteıik, 16 shildege qaraǵan túni Túrkııada áskerı tóńkeris áreketi jasalǵan.
