Shamalǵandyqtardyń gaz baǵasyna narazylyǵy: Jumys komıssııasy qurylatyn boldy

QONAEV. QazAqparat - Almaty oblysynyń Qarasaı aýdany, Shamalǵan aýyldyq okrýgi ákimdiginiń ǵımaraty aldyna gaz tarıfine narazylyq bildirgen turǵyndar jınaldy. Aýyl ákimdigi jaǵdaıǵa qatysty túsinikteme berdi, dep habarlaıdy QazAqparat tilshisi.

Aıta keteıik, búgingi kúni aýylda tabıǵı gaz úshin tarıf tekshe metri úshin 34,75 teńgeni quraıdy. Salystyrmaly túrde alsaq, Qaskeleń qalasyndaǵy gaz baǵasy tekshe metri úshin – 26,89 teńge. Jeltoqsan aıynda gaz tutyný tarıfi 1,5-2 ese qymbattaǵan.

Qarasaı aýdany turǵyndaryn gazben qamtamasyz etip otyrǵan kásiporyndardyń tarıftegi aıyrmashylyǵy turǵyndardyń narazylyǵyn týdyrdy. Máselen, «Almatygazservıs-Holdıng» AQ-da halyq úshin tabıǵı gaz tarıfi tekshe metrine 26-27 teńgeni qurasa, «Sıgma Gaz» JShS-de – 34 teńge 75 tıyn. Atalǵan JShS Qarasaı aýdany boıynsha Shamalǵan, Jandosov, Shalqar, Qaırat, Eńbekshi, Qumaral, Úshterek jáne Araı, Darhan saıajaılaryn kógildir otynmen qamtamasyz etedi. Abonentterdiń jalpy sany – 9906.

Halyq narazylyǵyna qatysty túsinik bergen aýdan ákimdigi tarıfter boıynsha jumys komıssııasy qurylatynyn málim etti.
«Gaz jetkizýshisi tarıfti «QR ishki naryǵynda taýarlyq gazdy kóterme saýdada ótkizýdiń shekti baǵalaryn bekitý týraly» Energetıka mınıstrliginiń 172-buıryǵyna negizdele otyryp kóterdi. Bul rette monopolııaǵa qarsy vedomstvomen kelisim tek tasymaldaý úshin alyndy. Osy faktini eskere otyryp, turǵyndarmen jıyn barysynda aýdan ákimdigi, aýdan prokýratýrasy, Almaty oblysy boıynsha tabıǵı monopolııalar departamenti jáne «Sıgma Gaz» JShS tarıfiniń jáne qosylý tarıfteriniń qalyptasýyn tekserý boıynsha qoǵamdyq ókilderden turatyn jumys komıssııasyn qurý týraly sheshim qabyldandy. 25 qańtarǵa deıin komıssııa atqarylǵan jumys týraly esep beredi», - dep habarlady aýdan ákimdiginen.