Shamalǵandaǵy kólik apatynan japa shekken bala ata-anasyn tanydy
ALMATY. QazAqparat – Búgin Almatyda balalarǵa shuǵyl medıtsınalyq kómek kórsetý ortalyǵynyń bas dárigeriniń orynbasary Dinmuhammed Rýzýddınov Shamalǵandaǵy apattan japa shekken patsıentterdiń jaǵdaıy týraly aıtyp berdi, dep habarlaıdy QazAqparat tilshisi.
«Keshe 22 qyrkúıekte 5 jastaǵy bala jasandy tynys alý apparatynan shyǵaryldy. Qazir bala esin jıdy, tamaq ishedi, sóılesedi, bárin túsinedi. Neırohırýrgııalyq bólimge aýystyryldy. Otanyń qajeti joq. Qazir emdeý sharalaryn jalǵastyryp jatyrmyz. Atap aıtqanda, mı qan aınalymyn jaqsartyp jatyrmyz. Aýrýhanadan shyqqan soń balaǵa uzaq ońaltý sharalarynan ótý kerek. Biz osy maqsatta qyzdy ekinshi balalar aýrýhanasyna aýystyramyz dep josparlap otyrmyz. Bala óz ata-anasyn tanyp otyr. Oǵan áli de psıhologtardyń kómegi qajet», - dedi bas dárigerdiń orynbasary.
Al ekinshi balanyń ahýaly óte aýyr. Ol áli esin jıǵan joq ári jasandy tynys alý apparatynda jatyr.
«Mıy dıffýzdy aksonaldy jaraqat alǵan. Bul óte aýyr jaraqat túrine jatady. Ókinishke qaraı, bıikten qulaǵanda, gıroskýterlerden qulaǵanda osyndaı jaraqat jıi kezdesedi. Qolymyzdan kelgenniń bárin jasap jatyrmyz», - dedi dáriger.
Bes jasar qyzdyń mańdaı-samaı súıekteri synǵan bolatyn. Oǵan Qaskeleń aýrýhanasynda bas súıekti trepanatsııalaý otasy jasaldy.
Esterińizge sala keteıik, 15 qyrkúıek kúni Shamalǵan stantsııasynda poıyz ben avtobýs soqtyǵysty.
Oqıǵa ornynda avtobýs júrgizýshisi mert bolyp, taǵy 3 adam Qarasaı aýdandyq aýrýhanasynyń jansaqtaý bólimine tústi.
Atalǵan derek boıynsha QR QK 345-babynyń 3-tarmaǵy boıynsha is qozǵalyp, tergeý júrip jatyr. Іstiń tergelýin Bas kóliktik prokýratýra baqylaýyna aldy.
QR Prezıdenti Qasym-Jomart Toqaev poıyz ben avtobýs soqtyǵysynan zardap shekkenderdiń týǵan-týystaryna kóńil aıtty.
