Shamalǵandaǵy aýmaqty patrýldik polıtsııa nege qadaǵalamaǵan – Turǵymbaev jaýap berdi
NUR-SULTAN. QazAqparat –Qozǵalys kóp bolatyn aýmaqty patrýldik polıtsııa nege qadaǵalamaǵan? Bul suraqqa Іshki ister mınıstri Erlan Turǵymbaev jaýap berdi, dep habarlaıdy QazAqparat tilshisi.
«Búgingi tańda bizde jol polıtsııasy joq. Patrýldik polıtsııa ǵana bar. Kólikterdiń keptelisi ózderińiz biletindeı, kez kelgen qalada, barlyq jerde bolady. Qalanyń ishinde de, syrtynda da... saǵat 17.00-19.00 aralyǵynda azamattardyń kóbi jumystarynan shyǵady, balabaqsha men mektepten balalaryn alyp qaıtady. Bizde polıtsııa qyzmetkerleri jetispeıdi. Sondyqtan, biz tek mektepter men balabaqshalardyń janynda, úlken kóshelerdiń qıylysynda patrýldik polıtseılerdi qoıamyz», - dedi Erlan Turǵymbaev OKQ-da ótken baspasóz máslıhatynda.
Eske sala ketsek, keshe Shamalǵan stantsııasynda poıyz ben avtobýs soqtyǵysqan bolatyn. Aldyn ala boljam boıynsha, avtobýs temir joldyń relsine shyǵyp ketken.
