Shamalǵandaǵy apat: Anasy men qos qyzdyń densaýlyǵy belgili boldy
ALMATY. QazAqparat – Almaty oblysynyń Shamalǵan stansasynda poıyz ben avtobýstyń soqtyǵysýynan aýyr jaǵdaıda aýrýhanaǵa túsken úsh adamnyń beti beri qarady, dep habarlaıdy QazAqparat tilshisi.
«5 jasar balanyń jaǵdaıy aýyr. Degenmen, kúnnen-kúnge dınamıkasy jaqsaryp keledi, sóıleı alady, tamaq ishedi. 3 jastaǵy ekinshi qyz – komada. Degenmen, jasandy tynys alý apparatynan ajyratyldy. Qazir ózdiginen dem alady. №7 qalalyq klınıkalyq aýrýhanada qos qyzdyń anasyna ota jasaldy. Jaǵdaıy ortasha, operatsııa sátti ótti, dınamıkasy jaqsardy», - dep habarlady Almaty qalalyq Densaýlyq saqtaý basqarmasynan.
Eske salaıyq, 15 qyrkúıek kúni Shamalǵan stansasyndaǵy temirjol ótkelinde poıyz ben avtobýs soqtyǵysty. Oqıǵa ornynda avtobýs júrgizýshisi mert bolyp, taǵy 3 adam Qarasaı aýdandyq aýrýhanasynyń jansaqtaý bólimine tústi. Olar – anasy men 5 jáne 3 jastaǵy balalar. 22 qyrkúıek kúni sábılerdiń biri es jıǵanyn jazǵan bolatynbyz.
Atalǵan fakti boıynsha QR QK-niń 345-baby 3-bóligi boıynsha is qozǵalyp, tergeý júrip jatyr. Іstiń tergelýin Bas kóliktik prokýratýra baqylaýyna aldy.
QR Prezıdenti Qasym-Jomart Toqaev oqıǵa saldarynan zardap shekkenderdiń týǵan-týystaryna kóńil aıtty.
