Shamalǵan stansasynda aınalma joldyń qurylysy bastaldy

TALDYQORǴAN. QazAqparat - Byltyr qyrkúıek aıynda avtobýs pen poıyz soqtyǵysqan Shamalǵan temir jol stansasynda aınalma joldyń qurylysy bastalyp ketti. Bul jóninde Almaty oblysynyń ákimi Amandyq Batalov Nur-Sultan qalasynda ótip jatqan brıfıng barysynda aıtty, dep habarlaıdy QazAqparat tilshisi.

«Shamalǵan stansasynda aınalma joldyń qurylysy bastalyp ketti. Kelesi jyly kúzde iske qosylady dep josparlap otyrmyz. Bul maqsatqa shamamen 4 mlrd teńgedeı qarjy bólingen. Osy aınalma jol iske qosylǵanda barlyq qaýip-qater joıylady dep oılaımyn. Qıyn jaǵdaıdan keıin iske kiristik, burynnan jasaıtyn jumys edi», - dedi A.Batalov.

Eske salsaq, ótken jyly 15 qyrkúıekte Shamalǵan stansasynda relstiń ústinde turyp qalǵan jolaýshylar avtobýsy men jolaýshylar poıyzy soqtyǵysqan bolatyn. Saldarynan avtobýs júrgizýshisi sol jerde mert bolyp, taǵy 3 adam Qarasaı aýdandyq aýrýhanasynyń jansaqtaý bólimine tústi.

Aıta keteıik, dál osy Shamalǵan temir jol stansasynyń janynan jaıaý júrginshiler kópiri salyndy. Endi avtokólikke arnalǵan aınalma joldyń qurylysy júrip jatyr.