Shamalǵan stantsııasynda jolaýshylar poıyzy er adamdy qaǵyp ketti
QR ІІM Kóliktegi polıtsııa departamentiniń baspasóz qyzmetinen málim etkenindeı, oqıǵa 3 qazan kúni Shamalǵan stantsııasynda boldy.
«Almaty-Aqtóbe» baǵytynda júretin jolaýshylar poıyzy belgilenbegen jerde temir joldan ótip bara jatqan er adamdy qaǵyp ketken. Ol alǵan jaraqattary saldarynan oqıǵa ornynda qaıtys boldy. Atalǵan derek boıynsha Almaty 1 stantsııasyndaǵy jelilik polıtsııa basqarmasynda QR QK 344-baby 2-bóligine (abaısyzda adam ólimine ákep soqtyrǵan qozǵalys qaýipsizdigi nemese temirjol kóligin paıdalaný erejelerin buzý) sáıkes qylmystyq is qozǵalyp, sotqa deıingi tergeý amaldary júrgizilýde», dep habarlady vedomstvodan.
Kóliktegi polıtsııa departamentinen túsken málimetke qaraǵanda, bıylǵy toǵyz aıda belgilenbegen oryndarda temir joldy kesip ótken 34 019 adam ákimshilik jaýapkershilikke tartyldy. Sondaı-aq jyl basynan beri poıyzdar 1 618 ret shuǵyl tejelse, sonyń 308-i temirjol boıynda adamdardyń, 1 140-y maldyń jaıylýyna baılanysty oryn aldy. Toǵyz aı ishinde 72 adam poıyzdyń astyna tússe, sonyń teń jartysynan astamy kóz jumdy. Sonyń ishinde 10 derek boıynsha balalar zardap shegip, 8-i mert boldy.
Kóliktegi polıtsııa departamentiniń bastyǵy Ońal Bekeevtiń aıtýynsha, jazataıym oqıǵalardyń negizgi sebebi – azamattardyń belgilenbegen jerlerde temir joldy kesip ótýi.
«Áli kúnge deıin adamdar temirjoldyń qanshalyqty qaýipti aımaq ekendigin, onyń zardaptaryn jete túsinbeıdi. Poezdardyń adamdardy jıi qaǵyp ketý derekteri myna stantsııalarda tirkelgen: Almaty 1 – 11, Shymkent – 7, Aqtóbe – 6 jáne Qaraǵandy-Suryptaý jáne Taraz stantsııalarynda 5 fakt. Departament qyzmetkerleri halyqqa túsindirý jumystaryn udaıy júrgizip kele jatqanyna qaramastan, oqys oqıǵalar azaıar emes», dedi O.Bekeev.
Kólik polıtsııasy azamattarǵa temirjolda muqııat bolý kerektigin eske salady. Onda arnaıy jabdyqtalǵan jerlerden ǵana ótý kerek. Jaıaý júrginshilerdiń tósem arqyly ótpes buryn temir jolda poıyzdyń, lokomotıvtiń nemese vagondardyń joqtyǵyna ábden kóz jetkizgenderi jón. Poıyzdyń sıgnalyn estý úshin qulaqqap pen kapıýshondy sheship ótý óte mańyzdy.