Shamalǵan aýylynyń turǵyndary gaz baǵasynyń qymbattaýyna narazy

QONAEV. QazAqparat – Almaty oblysynda Shamalǵan aýylynyń turǵyndary gaz baǵasynyń negizsiz qymbattaýyna narazylyq bildirýde, dep habarlaıdy QazAqparat tilshisi.

Shamalǵan aýylynyń turǵyndary kógildir otynnyń máselesin ońtaıly sheshýdi suraıdy. Jurtshylyq jeltoqsannan beri tarıf baǵasynyń negizsiz qymbattaǵanyna narazy.

Bes aıdan beri gazdyń aqshasyn tólemegen turǵyndar shamamen 100 myń teńgege jýyq qaryzdary baryn aıtady. Kompanııa ókilderi úsh úıdiń qubyryn gaz berýden ajyratqan.

Al Qarasaı aýdany ákiminiń orynbasary sáýir aıynyń basynan tarıf quny 28 teńge 98 tıynǵa tómendegenin jetkizdi. Alaıda, bul sheshimmen gazben qamtamasyz etip otyrǵan kompanııa kelispeıdi.

«Prokýratýra jáne elektr energııasynyń kóterme saýda naryǵyn baqylaıtyn departament shynymen de, zań buzýshylyqtardyń bolǵanyn anyqtady. Sol úshin de tarıf baǵasyn tómendetip otyr. Biraq «SIGMA GAZ» JShS bul sheshimmen kelispeıdi. Másele jylytý maýsymyna deıin tolyqqandy sheshiledi degen oıdamyz«, - dedi Qarasaı aýdany ákiminiń orynbasary Marlen Qasenov.

Ákimdik qyzmetkeri turǵyndardyń osy ýaqytqa deıin jınalǵan qaryzyn úsh aıǵa bólip tóleý úshin kompanııamen keliskenin jetkizdi. Sonymen birge eshbir aıyppul salynbaıdy.

Aıta keteıik, «SIGMA GAZ» kompanııasy bul jaǵdaı boıynsha jaýap berýden bas tartty.