Shamadan tys júk tasyǵan kólikterge aıyppul salý avtomattandyrylady

ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Úkimet otyrysynda jol sapasyn saqtaý salasyndaǵy tsıfrlyq sheshimderdiń qalaı qoldanysqa engizilip jatqanyn málim etti.

- Burynǵy jyldary shamadan tys júktelgen mashına salmaq sensorymen bekitilip, kamera bólek sýretke túsip, ınspektor qaǵaz túrinde hattamada zańsyzdyqty tirkeý úshin mashınalar toqtatylatyn. Bıyl adamı faktordy alyp tastaý josparlanýda jáne hattamalar avtomatty túrde resimdeledi. Ol úshin ákimshilik kodekske ózgerister engizilip, ıntegratsııalyq jumystar júrgizilip jatyr, - dedi mınıstr.

Onyń paıymdaýynsha, bul jańashyldyq jol boıyn torýyldaǵan kólik ınspektorlarynyń sanyn qysqartyp, sybaılas jemqorlyqtyń quramdas táýekelderin azaıtady.

- Búgingi tańda Astana Hubqa avtojol jáne kólik salasynda jumys isteıtin 24 ınnovatsııalyq joba tirkelgen. Olardyń kirisi 15 mlrd teńge, eksport 1 mlrd teńge bolyp, 1700-den astam jumys orny ashyldy, - dedi Jaslan Mádıev.

Buǵan deıin bıyl eldegi avtojoldardyń aqyly ýchaskelerindegi tarıfter orta eseppen 30 paıyzǵa ósýi josparlanǵany málim bolǵan edi.