Shamadan tys kredıt alǵandarǵa arnalǵan keńseler ashylyp jatyr
ASTANA. KAZINFORM - Elimizde nesıe alyp tóleı almaı júrgen azamattarǵa keńes beretin arnaıy keńse jumys isteı bastaıdy. Bul týraly Qarjy mınıstri Erulan Jamaýbaev málim etti.
«Qaryzsyz qoǵam» jobasy aıasynda arnaıy jol kartasy ázirlenip, bekitildi. Ol 6 negizgi baǵyt boıynsha 25 is-sharany qamtıdy. Jol kartasynyń árbir baǵyty boıynsha jumysty úılestirý úshin ákimdikterde jaýapty laýazymdy tulǵalar bekitildi. Respýblıkalyq mańyzy bar 3 qalada jáne elimizdiń 17 óńirinde halyqpen tikeleı jumys isteıtin óńirlik jobalyq keńseler qurylyp jatyr», - dedi Erulan Jamaýbaev Úkimet otyrysynda.
Onyń aıtýynsha, búginde halyqtyń shamadan tys kredıt alýy problemasy ózekti.
«Jobalyq ofısterdiń negizgi mindeti merzimi ótken kredıtterdi retteý, qarjylyq alaıaqtyqtan qorǵaý, sondaı-aq, azamattardyń bankrottyq máselelerin sheshýge, jumysqa ornalastyrýǵa járdemdesý jáne bıznesti qoldaý sharalaryn uıymdastyrý. Ákimdikter jobalyq ofısterdiń jumysy úshin qajetti ǵımarattar men materıaldyq-tehnıkalyq bazalardy bóledi. Oǵan bankter qarjylyq jaǵynan yqpaldasatyn bolady. Jobanyń taǵy bir mańyzdy baǵyty – azamattardyń, oqýshylar men stýdentterdiń qarjylyq saýattylyǵyn arttyrý», - deıdi ol.
