«Shalqar» radıosy jańa maýsymda jańa jobalaryn usynady
ASTANA. 29 qyrkúıek. QazAqparat - «Shalqar» radıosy - tek qana qazaq tilinde habar taratatyn respýblıkadyǵa jalǵyz arna. Radıonyń negizgi baǵyty men maqsaty - ultymyzdyń tarıhyn saralap, elimizdiń búgingi tańdaǵy jetistikterin nasıhattaý.
Bul týraly Qazaq radıosynyń baspasóz qyzmeti habarlady.
Osy turǵydan alǵanda «Shalqar» radıosy halqymyzdyń muńyn muńdap, joǵyn joqtap, ulttyq qundylyqtardy dáriptep, tili men dilin, dinin, áni men sazyn, ádeti men ǵurpyn, salt-sanasy men dástúrin keńinen nasıhattap keledi. Jańa maýsymda arnalyp daıyndalǵan radıohabarlarda da osy máseleler ulttyq arnamyzdyń negizgi nysanasy bolyp otyr. Radıjýrnalıster daıyndaǵan jańa habarlarda tyńdarman qaýymnyń talǵamyna saı keletin, tárbıelik mańyzdy dúnıelermen qatar, elimizdiń ekonomıkalyq, ındýstrıaldy-ınnovatsııalyq damý jolyn sóz etetin máseleler qamtylady.
«EKSPO.KZ»
«Ekspo-2017» kórmesin ótkizýdiń el tarıhy úshin mańyzdylyǵy tilge tıek etiledi. Habarǵa qatysqan sarapshylar tuńǵysh ret qazaq elinde ótetin halyqaralyq kórmeniń ereksheligi, osyǵan baılanysty salynatyn nysandar, iske asatyn jobalar men atqarylyp jatqan jumystardyń mán-jaıyn baıandaıdy.
«Shalqar shańyraǵynda»
Shalqardyń shańyraǵyna qonaqqa kelgen tanymal tulǵalar ult bolyp uıysý, ulttyq qundylyqtar men urpaq taǵylymy jaıynda áńgime qozǵaıdy. Tikeleı efırden ótetin 30 mınýttyq habar barysynda «Shalqar» radıosynyń tyńdarmandary kelgen meımanǵa osy máselege baılanysty kókeıinde júrgen saýaldaryn qoıa alady.
«Ulttyń jany- u lt tarıhy»
Memleket basshysy N.Á. Nazarbaev «Tarıh tolqynyndaǵy halyq» atty tarıhı zertteýlerdiń arnaıy baǵdarlamasyn jasaýdy usynǵan bolatyn. Osyǵan oraı Eýrazııa ulttyq ýnıversıetinde sóz sóılegen Memlekettik hatshy Marat Tájın óz tarıhymyzdy elekten ótkizip, tutastaı ulttyq tarıhı kartınany jasaýymyz qajettigin qadap aıtqan edi. Habarǵa qatysatyn belgili tarıhshylar men ǵalymdar Memlekettik hatshy Marat Tájınniń tapsyrmasynyń is júzinde qalaı júzege asyp jatqany jaıynda áńgimeleıdi.
«Sal dombyra»
Kez kelgen eldiń ulttyq tabıǵaty men bolmys-bitimin aıqyndaıtyn dúnıesi - onyń tóltýma mádenıeti. Sonyń ishinde án óneriniń alatyn orny erekshe. Osy turǵydan alǵanda «Sal dombyra» habary «Shalqar» arnasyndaǵy ulttyq mýzykany nasıhattaıtyn biregeı joba bolǵaly otyr. Habar barysynda ultymyzdyń án óneriniń tarıhy, san qyrly tabıǵaty týraly áńgime qozǵalady. Habarǵa dástúrli ánshiler qatysyp, ánshilik mektepterdiń tarıhyna toqtalady, onyń halyqqa jetý joly týraly baıandaıdy.
«Jeti ǵasyr jyrlaıdy»
Jyraýlar óz shyǵarmalaryn aqyl-naqyl, ósıet túrinde aıtqan. Olardyń tolǵaýlarynyń negizgi taqyryptary - týǵan jerdi, eldi súıý, Otandy qorǵaý, eldi birlikke shaqyrý, adamgershilik qasıetti nasıhattaý. Halqymyzdyń san ǵasyrlyq ómirin óner órnegine, aqyl sózine beınelep túsirgen, óshpes muramyzdy tyńdarman qaýymǵa dıktorlardyń oqýynda usynamyz. Halqymyzdyń ult bolyp uıysýynda aıryqsha orny bar aqyn-jyraýlarymyzdyń tańdaýly jyr jaýharlary aptasyna úsh ret 10 mınýttan berilip otyrady.
«Júzden júırik»
Ulttyq-tanymdyq ınteraktıvti habar. Baǵdarlama barysynda óner álemi, ulttyq mádenıt, tarıhqa qatysty tyńdarman tanymyn arttyratyn suraqtar qoıylady. Jáne qazaq kınolary men ánderinen úzindi jasyrylyp, baǵdarlama oıyn túrinde ótedi.
«Oıtalqy» radıokonferentsııa
Aıtýly datalarǵa, memlekettik mańyzdy oqıǵalar men ulttyq birlikke, Alash ıdeıasyna negizdelgen radıokonferentsııa. Bul baǵdarlamaǵa kem degende 3 adam qatysyp, belgili bir taqyryp jónindegi oılaryn ortaǵa salady. Habarǵa tarıhshy ǵalymdar, el aǵalary, ádebıetshi mamandar men zertteýshiler shaqyrylady.
«Mamandyq álemi»
Baǵdarlamanyń basta maqsaty - túrli mamandyqtar týraly aqparat berip, ár mamandyqtyń qyr-syryn túsindirý. Óz isiniń naǵyz mamany ataný ekiniń biriniń enshisine buıyrmaǵan. Ol úshin eń aldymen mamandyǵyńyzǵa degen mahabbat kerek. Óz isińdi tańdar aldynda qandaı mamandyqtar bar ekendigin jáne bul mamandyqtyń ne úshin kerek ekendigin túsindirip, mamandyq jaıly tolyq túsinik beriledi. «Maman ıesi ne isteıdi?», «Onyń qyzmetiniń nátıjesi nege alyp keledi?», «Maman ıesi qandaı jaǵdaıda jumys isteıdi?» degen suraqtarǵa jaýap beriledi.
«Qazyna» radıooıyny
Kitap oqý - bul tek bos ýaqytty ótkizý ǵana emes. Sonymen birge tulǵa bolyp qalyptasýǵa orasan zor kómegi tıetin paıdaly is. Sondyqtan radıooıynnyń mazmuny qazaqtyń aqyn-jazýshylarynyń qazynaǵa toly shyǵarmalaryn tyńdarmandarǵa oqytyp, sol shyǵarmaǵa baılanysty suraq qoıý arqyly jeńimpazdy anyqtaý. Máselen, «Shuǵanyń belgisi» shyǵarmasy boıynsha suraqtar qoıylady, sol habarda eń kóp suraqqa jaýap bergen jeńimpazǵa syı-sııapat tabystalady.
